Çarşema Sor li Tirbespiyê hat pîrozkirin

Y.J.Ê.Rˊê sersala Êzidî li navçeya Tirbespiyê pîroz kir.

ROJANE

16 nîsan, 2024 20:38

QAMIŞLO

Li gorî salnameya rojhilatê sibe Çarşema Sor e. Bi vê boneyê Yekitiya Jinên Êzidiyên Rojava (Y.J.Ê.R) li hola Roj a Tirbespiyê şahiyek li dar xist.

Di şahiyê de pêkhateyên navçeyê, nûnerên Meclisa Sûriya Demokratîk (MSD), partiyên siyasî, Rêveberiya Xwseriya Demokratîk û Kongra Star beşdar bûn.

Di şahiyê de endama rêvebera Y.J.Ê.Rˊê Hediye Şemo cejna Çarşema Sor li hemû şervanên azadiyê û civaka Êzidî pîroz kir û destnîşan kir ku dijminên civaka Êzidî hewl da wan qir bikin û komkujiyan li dijî wan pêk bînin, lê belê tevî wê jî wan dev ji kultûr, dîrok û xaka xwe berneda û ji bo wan fedakarî kir.

Endama rêvebera Kongra Star Îbtîsam Elî cejna Çarşema Sor pîroz kir û destnîşan kir ku jiyana hevbeş berhema fedakarî û têkoşîna şehîdan e û got: "Cejnên me yek in û em ê hemû cejnan bi hezkirin û aştiyê pîroz bikin."

Piştre koma şehîd Serhed stran pêşkêş kirin, koma şehîd Rêwan govendên folklorî û koma şehîd Zîlan stran pêşkêş kirin.

Her wiha hunermend Zendîn Omer stranên folklorî yên Êzidî pêşkêş kirin û beşdaran govend gerandin.

(mh)