‘Bila zimanê kurdî di destûra Sûriyeyê de misoger bibe’

Xwendekarên Til Temirê xwest zimanê kurdî di destûra Sûriyeyê de bibe zimanê fermî û misoger bibe.

ROJANE

14 gulan, 2026 05:05

HESEKÊ

ABDULXENÎ EL HAMAN

Xwendekarên bajarê Til Temirê li ser girîngiya zimanê kurdî û misogerkirina ziman di destûra Sûriyeyê de axivîn û got mafê wan heye ku zimanê wan bibe zimanekî fermî yê Sûriyeyê.

Yûsiv El Ehmed got: "Zimanê kurdî dîrok û hebûna gelê Kurd e. Eger em zimanê xwe winda bikin tê wateya me nasnameya xwe winda kir. Parastina zimanê kurdî û bi taybet li saziyên perwerde û fêrkirine berpirsyariyeke dîrokî ye ku ji me tê xwestin. Partiya Baas bi polîtîkayên xwe xwest zimanê kurdî lawaz bike û qedexe kir ku were bikaranîn. Sîstema Baasê qedexe kir ku gelê Kurd zimanê xwe bixwîne û ev yek bû sedem ku gelek nifş zimanê xwe yê kurdî nexwînin."

Hêvîn Şakir jî got: "Eger materyalên xwendinê bi zimanê kurdî bin em zêdetir fêm dikin û baweriya me bi me xurt dibe. Her wiha em çand û zimanê xwe diparêzin.”

Mihemed Mesûd El Yûnis got: “Em qebûl nakin ku zimanê me were paşguhkirin an jî girîngiyê nedin zimanê me û zimanên biyanî li ser me ferz bikin. Em dixwazin zimanê kurdî li Sûriyeyê bibe zimanekî fermî û ev yek mafê me yê rewa ye."

(np)

ANHA