Bi hezaran kes ji bo azadiya fîzîkî ya Rêber Abdullah Ocalan meşiyan

 Bi hezaran gel ji pêkhateyên Hesekê, Til Temir, Dirbêsiyê, Şedadê, Hol, Kampa Serêkaniyê û Waşûkanî, bi dirûşma “Bi rihê komunîzmê û civakek demokratîk, em ê bi Rêber Apo re azad bijîn” meşek girseyî li dar xist û daxwaza azadiya fîzîkî ya Rêberê Gelê Kurd Abdullah Ocalan kir.

Meş li çarxerêya Kevokê ya li Til Hecerê dest pê kir, li kolana sereke ya Miftî berdewam kir û li ber navenda Çand û Huner ya Xabûrî ya taxa  Miftî bi mitîngeke girseyî bi dawî bû.

Piştî deqeyek rêzgirtinê, bi navê Partiya Yekitiya Demokratîk (PYD), Sebrî Efrîn axaftin kir û got ku berxwedana gel û berxwedana Rêber Abdullah Ocalan dijmin gihandiye wê baweriyê ku zilim û zordarî ne çareserî ye û wiha berdewam kir: “Proje ya neteweya demokratîk çareseriya bingehîn a pirsgirêk û krîzên Rojhilata Navîn e.”

Endama Kordînasyona Kongra Star, Welîda Botî, jî di axaftina xwe de da zanîn ku rêya pêkanîna aştiyê û avakirina civakek demokratîk, bi azadiya Rêber Abdullah Ocalan ve girêdayî ye û ev li gotinên xwe zêde kirin "Em daxwaza azadiya Rêberê xwe dikin û dixwazin ku bi me re azad bijî. Dem hatiye ku em encama têkoşîna xwe ya dirêj a ji bo azadî û rûmetê bistînin. Jinan di vê têkoşînê de rolek pêşeng lîstine û ev rol dê bi îsrarî bidome.”

Mitîng bi dirûşmeya “Azadî ji bo Rêber Apo” bi dawî bû.

ANHA