Beşeke din a xwendekaran ji Peymangeha Tenduristiyê derçû

Beşa 3’yemîn a xwendekarên peymangeha Tenduristiyê ya Zanîngeha Rojava ku ji 47 xwendekaran pêk dihat, derçû.

Peymangeha Tenduristiyê ya Zanîngeha Rojava şahiya derçûna beşa 3’yan a xwendekarên peymangehê li dar xist.

Şahiya derçûna xwendekaran li Navenda Hîlala Zêrîn a li bajarê Hesekê bi amadebûna xwendekaran, malbatên wan, kadroyên fêrkirinê yên peymangehê, nûnerên Meclisa Malbatên Şehîdan û Desteya Tenduristiyê hat lidarxistin.

Di şahiyê de nûnera Meclisa Malbatên Şehîdan Ezîza Hesen derçûna xwendekaran li wan pîroz kir û banga pêkanîna ramanên Rêber Abdullah Ocalan û şopandina xeta şehîdan vegot.

Hevserokên Peymangeha Tenduristiyê Medya Mamo û Dr. Welat Ferhan axivîn. Di axaftinan de hate gotin peymangeha avkirina nifşên ku xizmeta civakê bikin, didomîne. Her wiha hate desntîşankirin ku bi armanca bilindkirina asta bijîşkî û gihandina kadroyeke bijîşkî ku bikare li hember pêşketinên heyî bibin bersiv, hemû hewldanên xwe pêk tîne.

Bi navê Desteya Tenduristiyê Dr. Hesen Ebdî jî bang li xwendekaran hemû hewldanan bikin. Ebdî doza domandina rêya şehîdan da.

Di dawiyê de bawername li xwendekarên derçûyî hatin belavkirin.

(bb)

ANHA