Beşdarên merasîma sersaxiyê ya şehîd Lewend soza domandina berxwedanê da

Bi sedan şêniyên bajarên Girkê Legê û Çilaxa yên kantona Cizîrê li bin konê sersaxiyê yê şehîd Lewend Girkê Legê (Rêwan Merîka) sersaxî ji malbata wî re xwest.

Konê sersaxiyê li gundê Gundikê Şelal ê gundewarê bakurê Çilaxa hat vedan.

Lewend Girkê Legê li herêma Aliyan a kantona Cizîrê dema li ser erka xwe ya leşkerî bû, di 9ˋê Sibata 2025ˋan de şehîd bû. Cenazeyê Lewend Girkê Legê li Pakrewangeha Şehîd Xebat a bajarê Dirêkê bi merasîmeke biheybet hat oxirkirin.

Di merasîmê de li ser navê Însiyatîfa Azadiya Rêber Abdullah Ocalan a Herêma Bakur û Rojhilatê Sûriyeyê Ferzende Munzur axivî û got: "Ne ji fedakariyên Hêzên Sûriya Demokratîk (QSD) bûya em îro bi azadî nedijîn û li herêmên me ewlehî û îstîqrar nîn bû. Em gelên herêmê deyndarê van fedakariyan in."

Munzur wiha domand: "Ji bo parastina nirxên şoreşê, destkeftiyên şehîdan û destkeftiyên têkoşîna Rêber Abdullah Ocalan li Rojava, divê em li dora QSDˋê ku rêxistina herî tarî li cîhanê têk bir, bicivin. Îro jî bi heman rihê QSDˋê striya dewleta Tirk a dagirker û çeteyên wê li Bendava Tişrînê û Qereqozaqê dişikînin."

Munzur di dawiyê de wiha got: "Wê azadî û avakirina Sûriyeya pirengî bi zendên QSDˋê pêk bê. Em li vir, soz didin şehîd û Rêberê xwe ku heta pêkanîna azadiyê em li ser şopa we ne."

Di dawiyê de wesîqeyê şehîd hat xwendin û radestî malbatê hat kirin.

(fr)

ANHA