Bavê şehîd Yasîn: Ji malbatê tenê zarokek rizgar bû
Bav û bapîrê şehîdên komkujiya Dehle ew ji ketina moşekê li ser mala Yasîn ku tenê ji malbata wî zarokek rizgar bûye, matmayî man.
Bi çavên stêr, bavê şehîd Yasîn, Elî El Ubeyd tiştê berbanga roja înê (9ˊê Tebax) bi serê wan de hatiye got: "Saet di 2ˊyan nîvê şevê moşek bi ser me de hat û di encamê de 7 kes ji malbata min şehîd bûn."
Bi dilsotî El Ubeyd got: "Zarokek 5 salî ji malbatê rizgar bû."
Di êrişên komên Dîfa El Wetenî û komên din ên hêzên hikumeta Şamê li dijî gundên Dehle û Cidêdit Begara de 11 kes şehîd bûn, her wiha tevahî top û guleyên hawn û obîsan li malên welatiyan ketin.
Li aliyekî din jî şêxê eşîra El Bûrehme Fewaz El Weys axivî û got: "Saet 2ˊyan berbanga roja înê (9ˊê Tebaxê) guleyên obîs û hawnan li maleke sivîlan ket, di encamê de 7 kes di nav de 4 zarok şehîd bûn."
El Weys piştgiriya xwe ji QSDˊê re nîşan da û got: "Helwesta me ji bo QSDˊê zelal e û tu nîqaş li ser vê yekê tune ne."
El Weys berpirsiyariya komkujiya ku li Dêrazorê pêk hatiye hilgirt ser komên girêdayî hêzên hikumeta Şamê û wiha li gotina xwe zêde kir: "Em komên Dîfa El Wetenî û komên din ên hêzên hikumeta Şamê berpirsê van êrişan dibînin. Em wan bi tundî li ser van êriş û komkujiyan şermezar dikin."
El Weys wiha dawî li gotina xwe anî: "Em rûspî û şêxên gundê Dehle bi QSDˊê re ne û ger were xwestin em ê li kêlek wan şer bikin."
(fr)
