Ava Elokê negihîştiye hemû taxên Hesekê

Li bajarê Hesekê taxa El Zihûr a bi navê Hoş El Bair tê naskirin, hîna ava Elokê negihîştiyê. Tax dikeve başûrê bajarê Hesekê. 22`yê Tîrmehê ava Elokê gihîşte bajarê Hesekê û gundewarên wê lê heyanî niha ji ber pirsgirkên şebekeyên avê av negihîştiye taxa El Zihûr.

Welatiyê bi navê Mistefa Hisên got ava Elokê tenê gihîştiye çend malan û wiha got: "Ji sedî 5 ava Elokê gihîştiye malan û nayê vexwarin. Em nizanin pirsgirêk di şebekeyên avê de ye yan jî hinek sedemên dîtir hene. Xelk neçar dimîne avê ji tankên avê bikire û niha 5 bermîl bi 60 hezar lîreyê Sûriyeyê ne. Hinek rêxistin jî hene 2 rojan carekê avê li xelkê belav dikin û bermîlên wan dadigirin."

Ji taxê Îd Dêf Ebdullah got: "Heyanî niha av negihîştiye taxa me û elektrîka me jî qut dibe. Heke rêxistinên avê belav dikin avê li me belav nekin, em neçar in avê bikirin. Em 5 bermîlan bi 60-70 hezar lîreyî dadigirin. Em ji aliyên têkildar dixwazin pirsgirêkên me yên xizmetguzariyê, bi taybet pirsgirêka avê û elektrîkê çareser bikin."

Mihemed Ebas jî got: "Pirsgirêk di şebekeya avê ya taxê de ye, li hinek cihan şikestî ye û li hinek cihan xitimî ye, ji ber wê av nagihîje malan. Em ji navenda bajar dûr in û nikarin avê ji xwe re bînin, neçar dimînin ku avê ji tankan bikirin. Em ji aliyên têkildar dixwazin pirsgirêka avê û elektrîkê çareser bikin."

Gerînendetiya Avê ya Hesekê diyar kir ku pirsgirêk di şebekeyên avê yên taxa El Zihûr de hene û ew niha dixebitin ku şebekeyên avê çêkin û pirsgirêka wan a avê çareser bikin.

(np)

ANHA