Projeya kişandina avê ji bo Hesekê destpê kir

Komeke endezyar, karmend, pirsporên projeya li gundê Sineq Sedûn ê başûrê Amûdê tev li civîna çapemeniyê bûn.

Hevserokê Desteya Rêveberiya Herêmî ya Herêma Cizîrê Silêman Ereb eşkere kir ku wan dest bi projeyê kiriye û li gor wê dê avê ji başûrê bajarê Amûdê bi rêya xeta Sinceq Sedûn-Kendûr bibin Hesekê. Li gor Ereb, ev proje li herêmê ya yekê ye û gelek girîng e. Ji ber ku xwedî dûrahiyên mirovî, aborî û civakî ye û armanca wê peydakirina avê ji zêdetirî milyonek kes li Hesekê û gundê xeta kişandina avê re ye.

Der barê siyasetên dewleta Tirk a dagirker de Ereb got: “Dewleta Tirk a dagirker piştî Serêkaniyê dagir kir, av ji ser herêmê qut kir û stasyona Elok wek çekekê li dijî sivîlên Hesekê û Til Temirê bi kar tîne.”

Girêdayî hewldanên Rêveberiya Xweser a Bakur û Rojhilatê Sûriyeyê Ereb wiha anî ziman: “Ji wê demê ve Rêveberiya Xweser hewl dide ku jêderên din ên ji xelkê bajêr û Til Temirê re peyda bike. Piştî gelek nirxandinan ji aliyê navendên lêkolînan, sazî û gerînendeyên avê yên Rêveberiya Xweser ve, diyar bû ku li herêma başûrê Amûdê, av heye. Piştî temamkirina lêkolîn û nirxandinên pêwîst, erêkirina Rêveberiya Xweser I ser projeyê, em îro destpêkirina qonaxa yekemîn a projeyê radigihînin.

Li gorî Ereb proje dê li ser 4 qonaxan bin ;

Qonaxa yekemîn ; kolandina 20 bîran bi kûrahiya 500 metreyan e.

Qonaxa duyemîn; projeya avakirina stasyona derxistina avê ku ji 6 hilmijan û hewzeke 5 hezar metrecab pêk tê.

Qonaxa sêyemîn; anîna kehrebeyê ji Amûdê bi rêya torekê.

Qonaxa çaremîn: kişandina avê bi dirêjahiya 62 kîlometreyan.

Lêçûna projeyê li gorî pêşbînan, 18 milyon dolar e.

Ereb wiha berdewam kir; “Proje di çarçoveya stratejiya Rêveberiya Xweser a Bakur û Rojhilatê Sûriyeyê de ji bo piştgiriya projeyên avê û ragihandina bajarê Hesekê wek bajarekî karesatî ye, hate ragihandin.”

Der barê nirxandina projeyê de Ereb got: “Ev nirxandin ji aliyê pirspor û endezyar, jeolojî yên saziyên Rêveberiya Xweser hatiye amadekirin. Em agahî didin we ku ev proje bandor li hewza avî û bîrên li herêmê nake. Her wiha em spasiya Şaredariya Sineq Sedûn û Komîteya Zanistî dikin li ku cihê xwe di vê nirxandinê û projeyê de girtin. Em hêviya serkeftinê ji Rêveberiya Xweser, cîhanê çavdêr, şîrket û karmendên dê di vê projeyê de kar bikin, dixwazin.”

(şx)

ANHA