Jinan rêbazên bidawîkirina întîharê nîqaş kirin

Civîn bi beşdarbûna bi dehan jinan li hola PYD'ê ya navçeya Tirbespiyê hat lidarxistin.

Di civînê de endama Koordînasyona Kongra Star Şîraz Hemo axivî û bal kişand ser tundiya li dijî  jinan.

Şîraz Hemo got: "Bi armanca lawazkirina civakê tundî li dijî jinan tê kirin. Em baş dizanin ku jin bingehên avakirina civakeke azad a demokratîk in, lê li cîhanê rêjeya jinên ku dawî ji jiyana xwe tînin zêde bûye."

Şîraz bal kişand ser bandora şerê taybet li civakan û wiha domand: "Bi armanca lawazkirina tevahî civakê şerê taybet li dijî jinan tê meşandin. Ji bo çareserkirina vê pirsgirêkê divê em jin ji komîn û meclisan bigirin heta rêveber û desteyan  rêxistina xwe xurt bikin."

Endama Koordînasyona Kongra Star Remziye Mihemed behsa Komploya Navneteweyî ya li dijî Rêber Abdullah Ocalan kir û wiha pê de çû: "Komplo di şexê Rêber Abdullah Ocalan de civak bi giştî û jin bi taybet hedef girt. Lew ra divê têkoşîneke hevpar were meşandin da ku azadiya fîzîkî ya Rêbertî were mîsogerkirin û di encamê de civakeke azad û demokratîk were avakirin ku tevahî mafên jinan tê de mîsoger bin."

(bb)

ANHA