Çalakvanên medyaya dîjîtal banga bidawîkirina dorpêçê kir

Bikarhênerên Twitter û Facebookê şeva berê saet ji 21:00′ê ve hashtaga ‏‎#‎‏lifttheembargovsshehba ji bo bidawîkirina dorpêça li ser Şehba, taxên Şêxmeqsûd û Eşrefiyê yên Helebê parve kir.

Çalakvan Ebas Xelef hashtag tevî wêneyê zarokê bi navê Reşmar Reşo parve kir û wiha nivîsî: "Hikumeta Sûriyeyê bi rêya ferzkirina dorpêçê li ser herêmên Heleb û Şehbayê di pêkanîna Qanûna Qeyser de beşdar e."

Nivîskar Dijwar Axa tevî hashtagê wêneyên êşên welatiyên li kampên Şehbayê parve kirin û wiha nivîsî: "Erka me ya wefadariya bi şêniyên Şehba, taxên Şêxmeqsûd û Eşrefiyê re em dengê xwe bilind bikin û ji bo bidawîkirina dorpêçê em bixebitin."

Artêş Mihemed jî tevî hashtagê wêneyê dorpêçê parve kir û wiha nivîsî: "Dewama dorpêçê ji aliyê hikumeta Şamê ve li dijî Şehba, Şêxmeqsûd û Eşrefiyê ve beşdariya di siyaseta qirkirinê de ye."

Baqî Kara Denîz nivîsek bi zimanê tirkî parve kir û wiha nivîsî: "Li pêş çavê cîhanê, gelek kes tên tecrîdkirin. Ew kesên çav li ser wê yekê digirin, sûcên dermirovî pêk tînin."

Navenda Firatê ya Ragihandinê Îhtiyatî tevî hashtagê nivîsek parve kir û got armanca dorpêçê yek e, ew jî zexta li ser koçberên Efrînê ye da ku ji Şehbayê koçber bin û herêmê bihêlin, ji xak û bajarê xwe Efrînê bi dûr bikevin."

Soran Mela Hesen jî wiha nivîsand: "Lîwaya 4′an a hikumeta Şamê dorpêça li ser taxên rojhilatê Helebê û kantona Şehbayê dewam dike û bi qedexeya derbasbûna sotemenî, pêdiviyên bingehîn û dermanan ji herêmê re êşên welatiyan zêde dike."

Hashtag dê îşev saet di 21:00′an de bi dawî bibe.

Hikumeta Şamê ji zêdetirî 5 salan ve dorpêçê li ser Şehba û her du taxên Helebê ferz dike û di Tebaxa 2022′yan de girantir kiriye, nahêle pêdiviyên bingehîn, sotemenî û derman derbas bikevinê.

(fr)

ANHA