​​​​​​​′Divê ji bo rizqê xwe em hevgirtî bin′

Ruxmî 75 saliya xwe, lê hîna ji bo parastina zeviyên xwe çalak e. Di qurmiçokên dest û rûyê xwe de sebir û hezkirinê dide malbat û civaka xwe.

Apê Remezan Hecî Seîd Osê (75) yê ji gundê Beyazê Biçûk ê li başûrê Tirbespiyê ya Qamişloyê, tevî zarokên xwe diçe nava zeviya xwe ya li heman gundî. Lê ruxmî rewşên jiyanê yên zehmet hîna bi xaka xwe ve girêdayî ye.

Seîd Osê wiha dibêje: "Ruxmî temenê min 75 sal e, lê hîna piranî demên xwe li nava zeviyên xwe derbas dikim û çavdêriyê dikim. Bi hemû enerjiya xwe tê de dixebitim. Dema li tovên min çandî dinêrim û ew digihîne û heta dema çinînê diçe hestên xweş derbas dikim. Wê demê mewsima çinînê ye û jêdera qûta min û qûta zarokên min e."

Seîd Osê genim, ceh û sebzeyên havînê diçîne û di avdanê de xwe dispêre hewza ku beriya 30 salan ava kiriye. Dema diçe ser zeviyê carinan neviyê xwe yê biçûk jî dibe û wî fêrî çandiniyê dike.

Seîd Osê destnîşan kir ku ji bo parastina zeviyan ji şewat an jî kiryarên din divê şêniyên herêmê hevgirtî bin û bi komîteyên taybet û Hêzên Ewlekariya Hundirîn re hevkar bin.

Seîd Osê mînaka şewata bi hezaran hektaran li navçeya Tirbespiyê di 2019′an de bi bîr xist û wiha dawî li gotina xwe anî: "Bi nêzbûna şewatê ji gundê me re; jin, zarok, ciwan û kal û pîr ji bo vemirandina şewatan derketin û bergiriyan digirin.”

(fr)

ANHA