Ji bo şehîd El Mizel û şehîd Egîd Zîlan merasîmek hat lidarxistin

Bi sedan şêniyên kantona Qamişloyê cenazayê şervanên QSD′ê Bender Mihemed Elî El Mizel (Ugab Til Koçer) li Goristana Uqab El Eswed a li Til Koçerê veşartin. Ugab Til Koçer 5′ê vê Gulanê di êrişa hewayî ya dewleta Tirk a li dijî nuqteya ewlehiya kampa Holê ya li gundê Qeyrewan ê Til Hemîsê de şehîd bû. Şêniyan gerîlayê HPG’ê Muzaffer Elwan Derwîş (Egîd Zîlan) yê ku 29′ê Çileyê 2023’yan di encama nexweşiyê de li herêma Zapê şehîd bûbû bi bîr anî.

Di merasîmê de ji fermandarên Meclisa Leşkerî ya Dêrikê Mihyedîn Xêrkî axivî û bal kişand ser rola şehîdan û fedakariyên ku ji bo parastina welat û gelê xwe dane.

Xêrkî îşaret bi êrişa dewleta Tirk a dagirker a li ser nuqteya ewlehiya kampa Holê ya li gundê Qeyrewan ê Til Hemîsê û diyar kir ku dewleta Tirk bi vê êrişê xwest zemîna vejandina çeteyên DAIŞ’ê li herêmê deyne.

Paşê endamê Meclisa Malbatên Şehîdan Husam Mubarek sersaxî da malbatên her du şehîdan û soza şopandina rêça da.

Her wiha hevserokê Meclisa navçeya Til Koçerê Salih El Kino banga xurtkirina têkoşînê kir û got: "Êrişên dewleta Tirk a dagirker wê li pêş armancên me yên azadiyê nabin bend."

Di dawiyê de wesîqeyên her du şehîdan hatin xwendî û radestî malbatên wan hatin kirin.

(fr)

ANHA