Rêxistina Sara xwest têkildarî qetilkirina jineke ciwan lêpirsîn were vekirin

Rêxistina Sara ya Têkoşîna li dijî tundiya li ser jinan têkildarî mijarê daxuyaniyek da.

Li gorî daxuyaniyê, jina ciwan Nûra Silêman Îbrahîm (sala 2004`an hatiye dinê) di 24`ê Nîsanê de ji aliyê mêrê ku pê re zewicî bû “Wedah Ehmed Îbrahîm” ê ji şêniyên Til Hemîsê hat qetilkirin.

Daxuyanî li pêşiya avahiya Kongra Star a li Til Hemîsê ji aliyê endama rêveberiya Rêxistina Sara Reşa Derwêş ve hat xwendin, bi dehan endmên saziyên sivîl û Rêxistina Sara beşdarî dayîna daxuyaniyê bûn. Pankertên mîna “Jin jiyane, jiyanê nekujin” hatin bilindkirin.

Di daxuyaniyê de qetilkirina Nûra hat şermezarkirin û hat gotin: “Hê jî zihniyeta desthilatdar û baviksalar sûcên hovane û tundiya li djiî jinan dewam dikin. Ev sûc xeteriyê li ser tevahî civakê çêdikin.”

Di dewama daxuyaniyê de hat destnîşankirin ku jina hatî qetilkirin dayika zarokeke 3 salî ye û sûcê qetilkirina wê wekî sûcekî li dijî mirovahiyê hat hesibandin.

Bang li aliyên hiqûqî û yên têkildar hat kirin ku der barê vê sûcî de bi lez lêpirsînê bidin destpêkirin û her kesê destê xwe di vê sûcî de heye ceza bikin.

(c)

ANHA