​​​​​​​Bi dirûşmeyên 'Bijî Serok Apo' agirê Newrozê li 11 navendan hil bû

Vê sibehê bi hezaran gelên Bakur û Rojhilatê Sûriyeyê û Helebê ji bo pîrzkirina Newrozê berê xwe dan 11 navendên pîrozbahiyan.

Li qadên pîrozbahiyên ku bi dirûşmeya “Bi rihê berxwedana Newrozê em ê Rêber Apo azad bikin û dagirkeriyê têk bibin” tên lidarxistin, wêneyên Rêber Abdullah Ocalan, cangoriyên azadiyê hatine daliqandin.

Cihên pîrozbahiyan bi alên YPG/YPJ, TEV-DEM, Kongra Star, Meclisa Malbatên Şehîdan û şirîtên kesk, sor û zer, hatin xemilandin.

Bi hezaran mêr, jin, ciwan û zarok ên ji pêkhateyên Kurd, Ereb, Suryan û Ermen bi cilên neteweyî beşdarî pîrozbahiyan dibin.

Piştî girseya gel berê xwe da navend û qadên Newrozê, dayikên şehîdan meşaleya Newrozê pê xistin û banga azadiya fîzîkî ya Rêber Abdullah Ocalan kirin. Agirê Newrozê li gundê Eloşê yê navçeya Ehdas a kantona Şehbayê, li herêma Şiqeyif a taxa Şêxmeqsûd a Helebê, Girê Miştenûr ê Kobanê û qada Fakulteya Çandiniyê ya Reqayê hat pêxistin.

Her wiha li qada bendavê ya li rojhilatê Hesekê, gundê Çolbistan ê Dirbêsiyê, bajaroka Hîmo yê Qamişloyê, Qada Newrozê ya li bendava Borzê ya Dêrikê, gundê Hilêq ê Girkê Legê, Qada Şehîd Mazlûm Dogan a Dirêcik ê Tirbespiyê, Qada Newrozê ya li gundê Çaxir Bazar ê Amûdê jî agirê Newrozê geş bû.

Tê payîn ku li ser navê Rêveberiya Xweser a Bakur û Rojhilatê Sûriyeyê, saziyên civaka sivîl axaftin bên kirin, stranên folklorî bên gotin.

(fr/cx)

ANHA

<iframe width="560" height="315" src="https://www.youtube.com/embed/1-VoyZv61oY" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" allowfullscreen></iframe>