Tevgera Ciwanên Şoreşger kongreya xwe ya yekemîn li Reqayê li dar xist

Bi sedan ciwanên Reqa, Tebqa, Dêrazor û Minbc tev li kongreyê bûn. Di destpêka kongreyê de, endamê Tevgera Ciwanên Şoreşger ên Bakur û Rojhilatê Sûriyê Ferhad Hesen axivî û bixêrhatina beşdaran kir.

Ferhad Hesen got: “Şoreşa Bakur û Rojhilatê Sûriyê di 2011`an de bi armanca xilaskirina ji dagirkeriyê dest pê kir. Ciwanan jî dest bi xwe birêxistinê kir li ser vê bingehê. Di sala dehan a şoreşê de, bi armanca tunekirina zulm û terorê bi hezaran şehîd û birîndar bûn qurban.”

Hesen wiha domand: “Niha hêza faşîst bi serkêşiya Erdogan û hevkarên wî, herêmên Zap, Metîna û Avaşînê topbaran dike û hewl dide berxwedana li wir tune bike. Lê em nahêlin ew armancên xwe pêk bîne.”

Hesen her wiha diyar kir ku dewleta Tirk a dagirker pêkanîna sûcan li Girê Spî, Serêkaniyê û Efrînê didomîne, armanc jî guhertina demografiya herêmê ye û ev li gotinên xwe zêde kir: “Lê ciwanan, şerê gel ê şoreşgerî ji têkoşîna li hember dagirkeriya Tirk re kir bingeh, Bi saya hevgirtin û têkoşîna xwe, me mirov li herêmê vejand.”

Hesen di dawiyê de bang li ciwanan kir ku li ber xwe bidin û li hember timayên dewleta Tirk a dagirker bisekinin.

Paşê sînevizyonek têkildarî kar û xebatên tevgerê û berxwedana gerîla li çiyayên Kurdistanê hat pêşandan.

Kongre bi encamnameyekê bi dawî bû ku ji aliyê endama Meclisa Ciwanên Reqayê Buşra El Ehmed ve hat xwendin.

Encamname wiha ye:

Azadiya rêber Abdullah Ocalan bibe bingeha têkoşîna şoreşgerî ya ciwanan.

Parastina destkeftiyên ku bi saya şehîdan li herêmê hatine bidestxistin.

Avakirina hêzên cewherî li herêmê.

Şerê gel ê şoreşgerî bibe bingeha kar û xebatan.

Lidarxistina civînên asayî û pêkanîna encamên wê di pratîkê de.

Lidarxistina semîneran têkildarî narkotîkê û koçberiyê.

Li dijî dagirkerî û xiyanetê lidarxistina hemleyan li ser medya dijîtal.

Belavkirina belavokan li ser xiyanet û dagirkeriyê li hemû herêman.

(dm)

ANHA