Li Qereçoxê operasiyoneke berfireh li dijî DAIŞ’ê hate destpêkirin

Artêşa Iraqê li dijî DAIŞ'ê, li çiyayê Qereçoxê yê navçeya Mexmûrê dest bi operasyoneke berfireh kir.

19 tîrmeh, 2022 08:37

NAVENDA NÛÇEYAN

Li Çiyayê Qereçoxê yê navçeya Mexmûrê dijî çeteyên DAÎŞ'ê operasyonek leşkerî hate destpêkirin.

Fermandarê Xwebexş ê Pêşmergeyên YNK’ê Xazî Feysel li ser operasyonê ev agahî parve kir: "Îro bi tevlîbûna hêzên Dije Teror a Iraq, Leşkerên Iraq û Pêşmerge saet derdorî 04:00’an bi qasî dirêjiya 15 kêlometreyan li dijî çeteyên DAIŞ’ê yên li ser çiyayê Qereçoxê operasyonek hate kirin. Di vê operasyonê de balafirên şer, helîkopter û balafirên keşfê cihê xwe girtine. Dibe ku ev operasyon çend rojan dom bike."

Demeke dirêj e çeteyên DAIŞ’ê li vê herêmê êrîşî artêşa Iraqê û sivîlan dike. Di encama van êrîşan de gelek şivan, şêniyên herêmê hatine qetilkirin û revandin. Her wiha leşkerên Iraqê jî hatin kuştin.

Çeteyên DAIŞ’ê bi taybetî çiyayê Qereçox û herêmên serweriya artêşa Iraqê yên navçeya Mexmûrê yên ser bi Mûsilê ve lê kêm e, xwe bi rêxistin dike û êrîşî sivîlan dike.