Şêniyên gundê Xirab Êto: Em dev ji axa xwe bernadin

Dewleta Tirk a dagirker ji roja pêncşemê heta roja înê 13`ê Gulanê gundên Ziyaret, Şiyûx Jorîn, Zor Mixar, Biyade, Ciloglo, Aşme, Seylm, Kor Elî, Dikmedaş, Seftik Jorîn û Jêrîn, Boban, Harqlî, Dolî Biçûk û derdora Girê Miştenûrê topbaran kirin.

Nûçegihanên me nêrînên şêniyên gundê Xirab Êto yê hatiye topbarankirin, girtin.

Şêniyê bi navê Elî Xeşman ê ji gundê Xirab Êto got: “Saet ji 16:00`an dest pê kir, dewleta Tirk ji baregehên xwe yên li Cerablusê û Tirkiyê gund kir hedef. Rast e windahî çênebûn lê belê zirarên madî yên mezin gihaştin mal û milkên şêniyan.”

Elî Xeşman diyar kir ku dewleta Tirk ji vê topbaranê armanc dike şêniyan bitirsîne û koçber bike, lê berovajî wê Elî Xeşman diyar kir ku şêniyên herêmê dev ji axa xwe bernadin û dê wê ji dijminan re nehêlin.

Welatiya bi navê Zelîxe Berkel jî got: “Her sal Erdogan êrişî me dike. Lê axa me li ser dilê me biha ye, em dev jê bernadin.”

Zelîxa wiha domand: “Dagirkeriya Tirk ji duh ve gund topbaran dike da ku em koçber bibin û li cem wî bibin penaber û li ser hesabê me pereyan bi dest bixe.”

Şêniyê bi navê Welîd Henîfî Salih jî êrişên dewleta Tirk a dagirker û bêdengiya hêzên garantor û hikumeta Şamê şermezar kirin û got: “Ji duh ve zêdetirî 200 top li ser me barîn.”

Welîd Henîfî Salih di dawiyê de got: “Gelo dewleta Tirk bi hinceta parastina ewlehiya xwe dixwaze bi tenê li vê cîhanê bimîne? Divê rê li pêşiya êrişên dewleta Tirk a dagirker ên li dijî herêmê bê girtin.”

Gundê Xirab Êto li rojhilatê Firatê li hember bajarê Cerablus ê dagirkirî ye. Pirî caran dibe hedefa artêşa dewleta Tirk ku Cerablus dagir kiriye.

(şx)

ANHA