Şîrketa Newroz li dijî bihabûna kel û pelan hewldanên xwe didomîne

Bakur û Rojhilatê Sûriyê li gorî herêmên din ên Sûriyê aramtir e û aştî lê serwer e. Lê herêm di aliyê leşkerî, aborî, siyasî û gelek warên din de rastî êrişên dijminê gelan dewleta Tirk a dagirker û alîgirên wê tê.

Li hemberî van hemû êrişan gel û saziyên ku Rêveberiya Xweser bi hev re ava kirine, ji bo parastina aramî û ewlehiya herêmê û peydakirina pêdiviyên bingehîn ên gel, dixebitin. Yek ji wan saziyan jî Şîrketa Newroz e.

Şîrketa Newroz di sala 2018'an de ji bo belavkirina şekir 9 şaxên wê li herêmên Firat û Cizîrê hatin vekirin û piştî ku cezayên Amerîkayê li ser rêveberiya Şamê di nîvê sala 2020'an de bandor li aboriya Bakur û Rojhilatê Sûriyê kir, navendên nû yên firotinê û market vekirin.

PIŞTÎ 19 NAVENDÊN FIROTINÊ DÊ YÊN NÛ JÎ WERIN VEKIRIN

Hevserokê Şîrketa Newroz Ciwan Şukrî der barê xebatên şîrketê de agahî dan û diyar kir ku armanca wan ew e ku bi buhayên herî guncaw xwarin û pêdiviyên bingehîn ji gel re dabîn bikin û got: "Armanca sereke ya Şîrketa Newrozê ew e ku di şert û mercên giran ên wekî êriş, ambargoyên aborî û hwd de jî pêdiviyên bingehîn bi buhayekî erzan peyda bike. Ji bo ku pêdiviyên bingehîn ên rojane yên wekî şekir, beqle, madeyên paqijiyê hwd bi hêsanî bigihîjin wan, bi giştî 19 marketên me hene û 7 li herêma Firatê, 12 jî li herêma Cizîrê ne. Her 9 şaxên li seranserî herêmê jî belavkirina şekir didomînin."

Şukrî got navendên firotinê yên li Qamişloyê dê bibin 3 û li taxên Xerbî û Şerqî yên Qamişlo werin vekirin.

'DI DEMÊN KRÎZÊ DE KARÊ ME GIRÎNGTIR DIBE'

Di şerê Rûsya û Ukraynayê de jî derket holê û di rojên destpêkê yên şer de li herêmên Rêveberiya Xweser û her wiha li tevahiya cîhanê krîza kêmasiya rûn çêbûbû.

Ciwan Şukrî diyar kir ku rola Şîrketa Newroz di dema krîzan de girîngtir dibe û li ser tevdîrên ku girtine, wiha got: "Di vê pêvajoyê de me hewl da ku bi buhayê herî guncaw qûtên bingehîn radestî gel bikin. Krîza aboriyê niha çareser bûye, lê belê krîza aboriyê ne faktora yekane ye ku bandorê li karê me bike. Faktorên wekî girtina deriyên sînor, astengkirina derbasbûnê û şer bandorê li xebatên me jî dikin. Li hemberî rewşên bi vî rengî bi depokirinê em tedbîran digirin û bi vî rengî mîsyona xwe bi cih tînin."

Şukrî got: "Divê were fêmkirin ku em ê nekarin vê bikin. Şîrketa me ji bo qezencê nîn e. Armanca me dabînkirina pêdiviyên bingehîn e."

Ciwan Şukrî wiha pê de çû: "Divê em têra xwe marketan vekin. Ji ber ku hin bazirgan dixwazin her krîzekê ji bo xwe veguherînin firsendekê. Saziya me jî xwedî wê potansiyelê ye ku pêşî li vê rewşê bigire. Buhayên me stabîl in. Marketên me di navbera saet 08.00-15.00'an de vekirî ne û guherîna nirxê dolar li buhayan nagirin. Ev jî dilê gelê me rehet dike."

POLÎTÎKAYÊN LI SER DERIYÊN SÎNOR

Ciwan Şukrî xuya kir ku ew ji rewşên li deriyên sînor ên yekser bandorê li wan dikin û anî ziman ku ji ber girtina deriyên sînor ê Sêmalka û Welîd, xwegihandina şekir ji bo gel zehmet bûye lê Şîrketa Newroz stokên xwe pêşkêşî gel kirine. Şukrî diyar kir ku dem bi dem ji ber siyasetên dewleta Tirk li deriyê bazirganiyê yê Minbicê pirsgirêkên dabînkirinê jî çêdibin, lê wan tedbîrên xwe girtine.

Hevserokê Şîrketa Newroz Ciwan Şukrî wiha lê zêde kir: “Em bi dilsozî xebatên xwe didomînin. Eger rexne û daxwazên gelê me hebin, deriyên me her tim li ber wan vekirî ne. Her wiha em bi meclisên navçeyan, bazirgan û bazirganên li seranserî Bakur û Rojhilatê Sûriyê re di nava koordînasyoneke baş de ne, ev jî faktoreke ku karê me hêsan dike. Bi kurtasî wek Şîrketa Newroz em xebatên xwe bi rengekî serkeftî dimeşînin."

ANHA