Cenazeyê şehîd Îd El-Ehmed li Sirînê hat veşartin

Şêniyên navçeya Sirîn a başûrê bajarê Kobanê cenazeyê şehîd Îd El-Ehmed li goristana Şehîdan a navçeyê spartin axê.

NÛÇE

12 sibat, 2022 14:55

KOBANÊ

Bi sedan şêniyên navçeya Sirînê û hevalên şehîd, cenazeyê şervanê Meclisa Leşkerî ya Minbicê Îd El-Ehmed ê ku dema erka xwe bi cih dianî di encama qezeya trafîkê de şehîd bû, bi merasîmê li goristana Şehîdan a navçeyê veşartin.

Merasîma oxirkirinê bi rêzgirtinê dest pê kir. Paşê ji rêveberên Têkiliyên Giştî yê QSD`ê yê navçeya Sirînê Ezîz Ehmed wiha axivî: "Şehîd Îd beşdarî hemû pêngavên leşkerî yên rizgarkirina Sirîn, Minbic, Tebqa, Reqa heta Baxozê bû. Ji bo jiyaneke azad û bi rumet û parastina xaka xwe ji êrişên terorê û dagirkeriyê û hemû kesên ku dixwazin vî xakê qirêj bikin mîna Erdogan û DAIŞ‘ê têkoşiya."

Ezîz Ehmed di axaftina xwe de destnîşan kir ku hemû pêkhate û neteweyên herêmê ji bo rumet û xaka vî welatî canê xwe feda dikin.

Paşê wesîqeya şehîd hate xwendin û radestî malbata wî hate kirin. Di dawiyê de cenazeyê şehîd di nava dirûşme û tilîliyan de hate veşartin.

(bx)

ANHA