Sûcekî şer…Dagirkeriya Tirkiyê nifşek ji xwendinê bê par hîşt

Piştî ku dewleta Tirk a dagirker û çeteyên wê sala 2019`an Serêkaniyê dagir kir û derdora 25 gundên navçeya Zirganê dagir kirin, 41 dibistanên li nêzî eniyên şer ji ber êrişên domdar ên dewleta Tirk û çeteyên wê nikarin deriyên xwe li pêşiya xwendaran vebikin.

Ruxmî hemû astengiyan û êrişan, lê gerînendetiya perwerdeyê ya kantona Hesekê ji bo dewamkirina perwerdeyê, li navçeya Zirganê û hin gundên wê, hemû pêdiviyên dibistanan bi cih anîn û gelek dibistan sererast kirin.

Lê dewleta Tirk a dagirker û çeteyên wê bi armanca koçberkirina şêniyan û dagirkirina gundên mayî, herêmê bê serûber topbaran dike.

Di vê çarçoveyê de, dewleta Tirk a dagirker di 5 û 14`ê Tebaxê de dibistana gundê Til El-Werd û gundê Rebîat û dibistana El-Erade gelek caran topbaran kir. Di encamê de zirarên mezin gihaştin dibistanan û êdî dibistan ji xizmetê derketin.

Her wiha di 17`ê Tebaxê de dagirkeran naverasta navçeya Zirganê topbaran kir û di encmê de jinek û zarokekî mirin û zirar gihaşt malên sivîlan û binesaziya navçeyê.

Têkildarî mijarê, Hevserokê Rêveberiya Dibistanan a Navçeya Zirganê Silêman Salih got: “Topbaran bi awayekî neyînî bandor kir. Ji ber ku gundî koçber bûn û gelek xwendekar neçûn dibistanê. Lê bi israra xwe hêdî hêdî zarok vegeriyan dibistana xwe."

Salih wiha domand: “Beriya ku çete Serêkaniyê û Girê Spî dagir bikin û nêzî navçeyê bibin, xebatên perwerdeyê baş derbas dibûn.”

Salih hişyarî da ku heke êrişên dewleta Tirk a dagirker ên li ser herêmê berdewam bikin, dê nifşek ji bê perwerde bimîne û ev yek destnîşan kir: “Êrişên dewleta Tirk a dagirker û çeteyên wê yên li ser eniyên şer, ji bo xwendekaran metirsiyan çêdikin û bi awayekî neyînî bandor li wan dikin.”

Di vê dawiyê de hemwextî gefên rayedarên Tirk ku herêmê dagir bikin, dewleta Tirk a dagirker  nuqteyên xwe yên li eniyên şer ên bi Zirganê re asê kirin.

Salih got rêxistinên hiqûqî û yên mirovî berpirsên sûcên dewleta Tirk ên li dijî xebatên perwerdeyê ye. Salih bêdengiya wan rêxistinan şermezar kir û destnîşan kir ku pêwîst e bi erkên xwe rabin û rê li pêşiya dagirkeriyê bigirin.

Li gorî daneyên Rêveberiya Dibistanan a Navçeya Zirganê diyar kir ku hejmara xwendekarên navçeya Zirganê berê 7 hezar û 500 xwendekar bûn, lê niha derdora 4 hezar û 500 xwendekar e.

(şx)

ANHA