‛Berxwedana 14’ê Tîrmehê deriyê serkeftina li dijî zilmê ye’

Li hola Azadî ya Meclisa Navçeya Şedadê, bi boneya salvegera 39’an a Berxwedana Tîrmehê li zindana Amedê ya Bakurê Kurdistanê civînek li dar ket, di civînê de şêniyên navçeya Şedadê şehîdên berxwedana zindanan bi bîr anî.

Civîn bi deqeyeke rêzgirtinê dest pê kir, piştre endamê rêveber ê Partiya Yekitiya Demokratîk (PYD) Mihêdî El-Dixêm axivî û wiha got: "Dewleta Tirk hîna hewl dide berjewendiyên mezinên xwe yên Osmanî yên dagirkirina herêman û kolekirina gelên têkoşer û azadîxwaz pêk bîne."

El-Dixêm da zanîn Berxwedana 14’ê Tîrmehê ya li zindana Amedê û gireva birçîbûnê derbeyeke mezin li dijî dewleta Tirk bû û ji bo gelên têkoşer peyamek bû ku ew ê li hember siyasetên dijminane bê tevger nemînin.

El-Dixêm diyar kir ku berxwedana girtîgehan deriyê serkeftin, pêkanîna azadî û demokrasiyê bû û bi şehadeta wan berxwedêrên berxwedana zindanan bi hezaran ji gelê Kurd li hember siyasetên dewleta Tirk a faşîst sekinîn.

El-Dixêm destnîşan kir ku şoreşa gelan a Bakur û Rojhilatê Sûriyê vîna xwe ji berxwedana 14’ê Tîrmehê wergirt, her wiha pêkhateyên herêmê li hember tevahî êriş û siyasetên derbekirina destkeftiyan sekinîn.

El-Dixêm eşkere kir ku bêdengiya dewletan û civaka navneteweyî li ser sûcên dewleta Tirk û redkirina vekirina dergehê mirovî li herêmên Bakur û Rojhilatê Sûriyê nîşaneya ku şirîkên dewleta Tirk in.

Civîn bi diruşmên silavkirina şehîdan bi dawî bû.

(fr)

ANHA