Hişyariyên ji ber qutkirina ava Firatê ji aliyê dewleta Tirk ve, berdewam in

Yekitiya Kooperatîfên Çandiniyê yên girêdayî rêxistinên civaka sivîl ên Reqayê qutkirina ava çemê Firatê ji aliyê dewleta Tirk a dagirker ve, şermezar kir û hişyar da ku dê di encamê de keraseteke mirovî li herêmê rû bide.

Endamên yekitiyê li pêşiya avahiya rêxistinên civaka sivîl a li naverasta Reqayê kom bûn û tev li dayîna daxuyaniyê bûn. Hevserokê Yekitiya Cotkaran Mihemed El-Salim daxuyanî xwend.

`KUŞTINA NETEWEKÊ BI TEMAMÎ`

Yekitiyê di daxuyaniya xwe de sûcên dewleta Tirk a dagirker ên birîna ava çemê Firatê li ser Bakur û Rojhilatê Sûriyê şermezar kirin ku di encamê de zevî telef bûn û bor bûn, bi vê yekê netewekê bi giştî qir dike.

Yekitiyê bang li Neteweyên Yekbûyî (NY) kir ku sûcên dewleta Tirk a dagirker ên li dijî mirovahiyê rawestînin û banga vekirina li pêşiya ava çemê Firatê li gorî lihevkirinên navneteweyî yên di navbera Sûriyê, Tirkiyê û Iraqê de kir.

`DIVÊ RÊXISTINA FAO VÊ MIJARÊ BIŞOPÎNE`

Her wiha yekitiyê bang li rêxistina FAO ya kar û barên çandiniyê kir ku vê mijarê bişopîne û qanûnên navneteweyî yên der barê vê mijarê de pêk bîne.

`ŞEREKÎ ABORÎ`

Girêdayî heman mijarê Meclisên Malbatên Şehîdan ên Tebqa, Reqayê û Minbicê, daxuyaniyeke hevbeş dan raya giştî. Li Tebqayê endama meclisê Foze El-Mihemed û li Reqayê endama meclisê Fatme Hisên El-Îsa û li Minbicê jî hevserokê meclisê Rebî Izedîn ve daxuyanî xwendin.

Di daxuyaniya hevbeş de, qutkirina dewleta Tirk ji ava çemê Firatê re û êrişên wê yên li dijî çiyayên Avaşîn, Zap û Metînayê yên li Başûrê Kurdistanê hatin şermezakirin.

Di berdewama daxuyaniyê de hat destnîşankirin ku dewleta Tirk bi qutkirina avê şerekî aborî li dijî şêniyên herêmê dimeşîne ku jêdera bingehîn a şêniyên herêmê ye ku di çandiniyê, derxistina kehrebeyê û peydakirina ava vexwarinê de bi kar tînin.

Di daxuyaniyê de teqezî li berdewamkirina berxwedana ku li Efrîn, Serêkaniyê û Girê Spî hat nîşandan, hat kirin.

`SÛCEKÎ ŞER E`

Di daxuyaniyê de bang li civaka navneteweyî û rêxistinên mafên mirovan hat kirin ku sûc û kiryarên dewleta Tirk rawestînin û beriya ku keraseteke mirovî bi serê şêniyên Bakur û Rojhilatê Sûriyê de were, ava çemê Firatê careke din bidin herikandin.

MALBATÊN ŞEHÎDAN DÊ PIŞTGIRIYA HPG`Ê BIKIN

Di daxuyaniyê de êrişên dewleta Tirk ên li dijî çiyayên Avaşîn, Metîna û Zapê hatin şermezarkirin û hat diyarkirin ku dewleta Tirk bi van êrişan dixwaze vîn û giyana neteweya demokratîk a li Rojhilata Navîn têk bibe.

Di daxuyaniyê de hewldanên dewleta Tirk ên ji bo dagirkirina wan çiyayan bi binketî hatin wesifandin û ev yek hat gotin: “Hêzên me li hemberî wan li ber xwe didin û destanên lehengiyê nîşan didin. Hêzên Parastina Gel (HPG) ragihand ku dewleta Tirk hewl da êrişî herêmên Avaşîn, Metîna û Zapê bikin lê bi bin ket.”

Di dawiya daxuyaniyê de Meclisa Malbatên Şehîdan a Tebqayê piştgiriya xwe ya ji bo HPG`ê ragihand û got: “Em ê piştgiriya wan bikin. Ji bo rizgarkirina axa me û tunekirina dagirkera Tirk ciwanên me amade ne.”

(şx)

ANHA

<iframe width="560" height="315" src="https://www.youtube.com/embed/T5B5cM3fIzI" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture" allowfullscreen></iframe>