Rêxistinên jinan: Endamtiya Îranê di komîteyeke têkildarî jinan de ji jinên îranî re îxanet e

Rêxistinên jinan ên Îranê yên li Fransa, Swêd û Îtalyayê hilbijartina Îranê wek endam di komîteyeke Neteweyên Yekbûyî (NY) ya têkildarî rewşa jinan de, şermezar kir û got ev endamtiya ku dê 4 salan berdewam bike, ji hemû jinên Îranê re îxanet e.

Roja înê her 3 rêxistinan; Komeleya Jinên Îranê ya Fransayê, Komeleya Jinên Îranê ya li Swêdê û Komeleya Jinan a Demokratîk ên Îranê ya li Îtalyayê bi daxuyaniyeke hevbeş got: "Em komeleyên jinan hilbijartina rejîma Îranê wek endam di komîteya NY`yê ya têkildarî rewşa jinan de, wek îxanetekê ji hemû jinên îranî re bi nav dikin ku di dirêjahiya 40 salî de bûn qurbaniyên sereke yên vê pergalê."

Roja sêşemê Meclisa Aborî û Civakî ya NY`yê Îran wek endam di Komîteya NY`yê ya têkildarî rewşa jinan de ji bo 4 salan, hilbijart. Ev endamtî di civîna yekemîn a gera 67`an a sala 2022`yan de dest pê dike.

Komîteya NY`yê ya têkildarî rewşa jinan; desteya navneteweyî ya sereke ye ku ji bo xurtkirina wekheviyê di navbera her du zayendan de û ji bo pêşxistina jinan xebatê dimeşîne.

(bx)