Li Kobanê beşa neştegeriya qestere hat vekirin

Îro bi beşdarbûna bi dehan bijîşkan û endamên saziyên sivîl û nûnerên partiyên siyasî yên kantonê, beşa qestere hat vekirin.

Têkildarî mijarê bijîşk û pisporê nexweşiyên dil, Ehmed Ewnî Bozan axivî û behsa pêvajoyên pêkanîna vê projeyê kir ku 3 sal dirêj kiriye. Bozan wiha domand: “Em li bendê bûn ku kadroya vê beşê amade bibe. Ji ber ku hejmara wan li herêmê kêm e û amûrên pêwîst wê demê ne hazir bûn. Lê niha her tişt amade ye.”

Bozan bi bîr xist ku ji bilî rewşên lezgîn dê rojane 3 nexweşên dil derman bikin, piştî kontrolkirina nexweş heke pêwîstiya wî bi neştegeriya qetereyê hebe dê jê re çêkin.

Bozan îşaret pê kir ku hejmara bijîşkên di vî beşî de 4 heta 5 in, 3 hemşîre di odeya lênêrîna navendî de û 2 di odeya niştergeriya qestereyê de. Her wiha 5 kes wek alîkarên ku di beşa îdarî de berpirsyar in, di vî beşî de kar dikin.

Der barê heman mijarê de hevserokê Desteya Tenduristiyê ya Herêma Firatê Ehmed Mehmûd piştrast kir ku wan bi armanca sivikkirina azarên nexweşên dil û kêmkirina lêçûnê li ser wan ev beş vekir. Mehmûd wiha domand: “Li şûna ku biçin li derveyî herêmên Firatê xwe derman bikin, ji niha û şûn de dê li herêmê xwe derman bikin. Ev yek dê barên rêwîtiyê û lêçûnên madî li ser wan sivik bikin.”

Mehmûd destnîşan kir ku lêçûna neştergeriya qestere dê nîvê lêçûna wê ya li derveyî nexweşxaneyê be.

Hevserokê Tevgera Civaka Demokratîk a herêma Firatê Osman Xelef vekirina beşa qestere pîroz kir û got: “Ev gav ji bo şêniyên herêmê gelek girîng e. Em bi hêvî ne ku bi ser bikeve.”

Endamê Desteya Rêveber a Partiya Yekitiya Demokratîk (PYD) Ehmed Şêxo diyar kir ku li gel şertên dijwar ku herêm tê re derbas dibe, şer û gefan, avêtina vê gavê asta berxwedana gelên herêmê û saziyên wê û heta bijîşkên wê li hemberî tevahiya komployan nîşan dide.

Bijîşk Reşad Kitkani û Ehmed Ewnî Bozan dê beşa qestereyê bi rê ve bibin. Her du jî pisporên nexweşiyên dil in û ji şêniyên Kobanê ne.

(şx)

ANHA