'Divê civaka navneteweyî erka li hemberî kêmkirina ava Firatê bi cih bîne'

Mihemed Elî El-Ebo têkildarî êrişên dewleta Tirk a dagirker ên li dijî  navçeya Eyn Îsa û Minbicê û kêmkirina ava Firatê ji aliyê dewleta Tirk ve ANAH'yê re axivî.

Mihemed El-Ebo got, êrişên artêşa Tirk a dagirker ên li ser herêmên Bakur û Rojhilatê Sûriyê  bi armanca têkbirina ewlehî û aramiyê ne, ev yek bandoreke neyinî li rewşa aborî, civakî û siyasî kir û dibe ku bandorê li Sûriyê bi giştî jî bike.

El-Ebo ev yek li gotina xwe zêde kir: "Di êrişên dawî yên li ser gundên Minbic û Eyn Îsayê de bersivek ji aliyê hikumeta Şamê ve hebû, lê bersiveke şermok bû û ne li gorî berpirsyariya hikumetê ya li beramberî serweriya erdê Sûriyê re bû."

Têkildarî hebûna Rûsyayê ya li herêmên Bakur û Rojhilatê Sûriyê ku wekî aliyekî garantor ê peymana agirbestê ye ya ku di 2019`an de hate mohrkirin, Mihemed Elî El-Ebo got divê garantorê rûsî rola xwe ya bingehîn bi cih bîne ku ji bo garantiya ewlehî û aramiyê herênên Bakur û Rojhilatê Sûriyê hatiye.

Mihemed di berdewamiya axaftina xwe de ev xal diyar kirin: "Em dixwazin bigihêjin çareseriyekê ji aloziya Sûriyê re, lê em dibînin ku em dûrî çareseriyê dikevin û aliyên garantor jî bi aliyên din re bi awayekî cuda dan û standinan dikin û hin aliyan li ser hesbên aliyên din digre."

Têkildarî kêmkirina ava Firatê li ser Sûriyê  ji aliyê dewleta Tirk ve, Hevserokê Meclisa Qanûnsaz a Rêveberiya Sivîl a Demokratîk a bajarê Minbic û gundewarên wê Mihemed Elî El-Ebo ev nirxandin kir: "Şerê ku dewleta Tirk a dagirker di demên dawî de dike, ji şerê leşkerî yê li dijî herêmên Bakur û Rojhilatê Sûriyê veguherî şerê li dijî gelê Sûriyê bi giştî, ev şer bi rêya qutkirina ava Çemê Firatê tê meşandin."

El-Ebo da zanîn ku civaka navneteweyî berpirsa zêdegaviyên dewleta Tirk a dagirker e, ji ber ku dagirkeriya Tirk hewldana lawazkirina têkoşîna li herêmên Bakur û Rojhilatê Sûriyê dike û divê civaka navneteweyî li hemberî van zêdegaviyan bisekine.

Hevserok Mihemed Elî El-Ebo di dawiya axaftina xwe de diyar kir ku ew ê li Bakur û Rojhilatê Sûriyê li dijî vê zêdegaviyên dewleta Tirk û hevkariya navneteweyî ya ji dewleta Tirk a dagirker re bisekinin, da ku destkeftiyên piştî têkirina rêxistina DAIŞ`ê li herêmên Bakur û Rojhilatê Sûriyê hatine bidestxistin, biparêzin.

(eh)

ANHA

<iframe width="560" height="315" src="https://www.youtube.com/embed/vK68k7bMch4" frameborder="0" allow="accelerometer; autoplay; clipboard-write; encrypted-media; gyroscope; picture-in-picture" allowfullscreen></iframe>