Di panela MSD'ê de xurtkirina diyalogan hate xwestin

Panela MSD`ê bi dirûşma "Ber bi kongreyeke neteweyî ve ji bo şêniyên Cizîr û Firatê" ku bi beşdariya 500 kesayetên siyasî û civakî yên kantona Hesekê pêk hat, bi dawî bû.

Di panelê de, axaftina komîteya amadekar a panelê hate kirin, 3 semîner hatin dayîn. Ya yekemîn li ser têkiliyên dîrokî yên di navbera gelên herêmê, rola wan di avakirina pêşeroja gelê Sûriyê û rola pêkhateyên Sûriyê di garantiya van têkiliyan de, ya duyemîn diyalogên Sûrî-Sûrî, diyaloga bi muxalefetê re, diyaloga bi hikumetê re û diyaloga Kurdî-Kurdî û bandora wan di çareseriya siyasî de û mijara sêyemîn li ser Rêveberiya Xweser û mekanîzmaya kar û xebata saziyan û mekanîzmaya pêşxistina beşdariya ji Rêveberiya Xweser re bû.

Di nîqaşên beşdaran de, girîngiya diyaloga Sûrî-Sûrî û mekanîzmaya peywendiya bi hikumeta Sûriyê û xurtkirina têkiliyan û avakirina çarçoveyek siyasî dûrî mudaxeleyên derve hatin destnîşankirin.

Her wiha hate destnîşankirin ku pêwîst e hevdîtin bi hikumeta Sûriyê re were kirin ji bo ku bi Rêveberiya Xweser re rûnê û banga diyalogan li hemû aliyan were kirin da ku encamên erênî ji bo tevahî Sûriyê pêk were.

ANHA