HPC'ê ya Şêxmeqsûdê berxwedana Heftenînê silav kir

Bi pêşengtiya Hêzên Parastina Civakî (HPC), bi sedan şêniyên taxa Şêxmeqsûd beşdarî  xwepêşandanek şermezarkirina êrişên dewleta Tirk a dagirker û silavkirina berxwedana Heftenînê bûn.

Xwepêşandan ji pêşiya hola civînan a beşê rojhilatê yê taxa Şêxmeqsûd dest pê kir. Xwepêşanderan posterên Rêber Abdullah Ocalan hildan, pankartên wekî "Li hemberî êrişên qirker û dagirkirinê em ê asta têkoşînê bilind bikin" û alên HPC'ê hilda bûn.

Xwepêşandan piştî ku li kolanên sereke yên taxê geriya li çerxerêya 7 Şehîdan a li beşê rojhilat ê taxê sekinî û deqeyeke rêz hate girtin.

Endama HPC'ê Sûad Mihemed daxuyanî xwend .

Sûad, êrişên dewleta Tirk a dagirker ên li ser herêma Heftenînê şeremzar kirin û got, ev êriş binkeftina hundirîn a dewleta Tirk û krîza wê ya aborî nîşan dide, ji ber vê dixwaze bi van êrişan krîza xwe derxîne derve.

Sûad Mihemed destnîşan kir ku ajan û xayîn yên ku bi îstîxbarata Tirkiyê re kar dikin wê dawiya wan xirab e û wiha domand: "Divê her kes berpirsyartiyên xwe yên dîrokî bi cih bînin, erk û bangewaziyan pêk bînin. Divê em li benda fermana tu kesî nemînin. Her ferdek ji me dikare bibe têkoşer û şoreşger, bi rêya xweperwerdekirin û xwe rêxistinkirin em dikarin serkeftinê qezenc bikin."

Sûad Mihemed her wiha got: "Berxwedana gerîla wê bi xwîna şehîdan dewam bike. Artêşa Tirk a dagirker ji ber derbeyên ku li Heftenînê dixwe bê çare maye. Ev pêvajoya dîrokî wê teqez serkeftin û azadiyê bîne."

Piştî axaftinan diruşmeyên silavkirina berxwedana Heftenînê û şeremzarkirina binpêkirinên dewleta Tirk hatin avêtin.

ANHA