‘Divê her der veguhere Heftenînê’

Di 15`ê Tebaxê de Tevgera Ciwanên Şoreşger bi koordîneya Yekitiya Jinên Ciwan a kantona Kobanê dest bi "pêngava serkeftinê" kir û banga bilindkirina têkoşîna li dijî dagirkeran kir.

Di çarçoveya pêngavê de gelek çalakî hatin lidarxistin û belavokên ku banga bilindkirina asta têkoşînê li dijî faşîzma Tirk dikin, hatin belavkirin. Tê payîn ku çalakiyên din jî bên lidarxistin.

Hemwextî vê yekê, dewleta Tirk a dagirker ji nîvê meha Hezîranê de êrişên xwe li dijî Herêmên Parastinê yên Medyayê yên Başûrê Kurdistanê dewam dike. Li hemberî êrişan, berxwedana HPG`ê di astekî bilind de dewam dike.

Endamê Tevgera Ciwanên Şoreşger Mihemed Mehmûd Hisên wiha got: "Gerîla li dijî DAIŞ`ê şer kirin û hemû pêkhateyên Şengal û Kobanê parastin. Em jî piştgiriya berxwedana wan a li dijî faşîzma Tirk dikin. Ji lewra me ji bo destekdayîna berxwedana Heftenînê bi rêya pêngava xwe, seferberî ragihand."

Mehmûd Hisên wiha lê zêde kir: "Armanc ji pêngavê ew e ku bala tevahî cîhanê li ser berxwedana Heftenînê bê kişandin. Em hewl didin bi rêya civîn, semîner û senefîzyonan, propogandeya vê berxwedana dîrokî bikin."

Endamê tevgera ciwanan destnîşan kir ku wan plansaziya çalakiyên pêngavê danîne û got: "Me plansaziyeke berfireh a çalakiyên pêngavê danî, lê belê ji ber belavbûna Koronavîrusê li herêmê me nikarî plansaziya xwe bi temamî pêk baniye. "

Di demeke berê a vê mehê de ji bo pêşîlêgirtina belavbûna Koronavîrusê, Rêveberiya Xweser a Bakur û Rojhilatê Sûriyê gelek biryar da.

Di wê çarçoveyê de, hemû rengên kombûnan hatin qedexekirin. Ev yek li pêşiya lidarxistina meş û çalakiyên destekdayîn bi berxwedana Heftenînê re bû asteng.

Mihemed Mehmûd Hisên bang li ciwanên ji hemû pêkhateyan kir ku tev li pêngavê bibin û got: "Ez bang li ciwanên Ereb, Kurd, Suryen, Turkmen û Aşûr dikim ku tev li pêngava me bibin û li berxwedana Gerîla ya di şerê li dijî DAIŞ`ê de, xwedî derkevin. Divê her der veguhere Heftenîn."

Hêjayî bibîrxistinê ye ku, Tevgera Ciwanên Şoreşger ên Sûriyê di 15`ê Tebaxê de ji bo piştgiriya berxwedanan li dijî êrişên li ser xaka Kurdistanê, li gelek bajarên Bakur û Rojhilatê Sûriyê pêngava "Em ê biserkevin" ragihandibû.

(cx)

ANHA