Ciwanên Efrînê li dijî dagirkeriyê meşiyan

Îro bi dehan endamên Tevgera Ciwanên Sûriyê ya herêma Efrînê bi meşekî êrişên artêşa Tirk a dagirker li dijî Şengal û Wargeha Mexmûr û herêmên Parastina Medya şermezar kirin.

17 hezîran, 2020 17:50

ŞEHBA

Bi dehan endamên Tevgera Ciwanên Sûriyê ya herêma Efrînê li gundê Babinsê yê girêdayî navçeya Ehdas li kantona Şehbayê kom bûn û li dijî êrişên Tirkiyê meşiyan.

Ciwanan wêneyên şehîdan, Abdullah Ocalan, alên Tevgera Ciwanên Şoreşger û pankartên bi nivîsên `Mirin û rûreşî ji xiyanetê re`, `Bijî Yekitiya Kurd` û `Bi hêrsa malbatên şehîdan em ê agirê Îmraliyê vemirînin` hildan.

Meş ji deriyê têketina gund ber bi qada gund ve destpê kir. Ciwanan sloganên şermezarkirina dagirkeriya Tirk û silavkirina berxwedana Şengal û Efrînê berz kirin.

Meş li qadê rawestî û veguherî mitîngê. Di mitîngê de piştî deqeya rêzgirtin endama tevgerê Evîn Bilal axivî û êrişên Tirkiyê şermezar kirin. Evîn destnîşan kir ku berxwedana li dijî dagirkeriyê li tevahiya Kurdistanê berdewam e.

Her wiha endamê tevgerê Reşîd Efrîn axivî û got: "Gelê Şengal û Xakrukê piştgiriya Berxwedana Serdemê kirin û li rex şêniyên Efrînê sekînin. Divê em jî piştgiriya berxwedana wan bikin."

Meş bi berzkirina dirûşmeyên silavkirina berxwedanê bidawî bû.

(şx)

ANHA