Li Kampa Waşûkanî bergiriyên pêşîlêgirtina belavbûna vîrusa Korona

Vîrusa Korona dikare zirarên mezin bi mirovan bike û nîşaneyên wê jî bi sermayê û bêhnvedana teng diyar dibin.

Ji bo pêşîlêgirtina vîrusê Rêveberiya Xweser a Bakur û Rojhilatê Sûriyêdibistan, zanîngeh, kombûn û saziyên fermî girtin da ku mecal li pêş komîteyên bijîşkiyê bê vekirin ku saziyan wek tedbîrekê dezenfekte bikin.

Metirsiyên berbelavbûna vîrusa Koronayê li kampên koçberên li Bakur û Rojhilatê Sûriyê hene. Ew jî ji ber kêmderfetan û bi sedema barê mezin ê li ser pişta Rêveberiya Xweser piştî derketina tevahî rêxistinên mirovî bi destpêkirina êrişa dewleta Tirk a dagirker li ser herêmên Bakur û Rojhilatê Sûriyê.

Kewser Mihemed ji Serêkaniyê û li Kampa Waşûkanî bi cih bûye û wiha got: "Daxwaza me dezenfekte û paqijkirina destavên li kampê ye. Ji ber ku metirsiyeke mezin çêdikin. Pêdivî bi paqijkirin û dezenfekteyê heye."

Li aliyekî din jî koçber ji gundê Menax ê girêdayî Serêkaniyê Kewser Ziyab wiha da zanîn: "Kamp paqij e. Lê pirsgirêka bingehîn destav û serşok bê ser û ber in ku ji wan av diherike konan. Daxwaza me sererastkirina serşok û dezenfektekirina wan e."

Der barê bergiriyan de, endama rêveber a rêveberiya Kampa Waşûkanî Stêr Reşk diyar kir ku gelek bergirî der heqê pêşîlêgirtina vîrusê de girtine. Her wiha dê kombûn li kampê bên qedexekirin, serdan li kampê ji derve û hundir bên qedexekirin û dê dewama dibistanan jî bê rawestandin. Li aliyekî din jî gelek civîn bi rêxistinên herêmî û Desteya Tenduristiyê re ji bo pêşîlêgirtina berbelavbûna vîrusê girtin.

Stêr Reşk bal kişand ser ku dê derman û madeyên dezenfekteyê li şêniyan belav bikin û dê Desteya Tenduristiyê kampê dezenfekte bike. Stêr bang li rêxistinên mirovî kir ku alîkariyan pêşkêşî kampê bikin û kadroyên bijîşkî zêde bikin.

Rêxistina Heyva Sor a Kurd a li kampê hemleya hişyarkirinê ji şêniyan re der barê çawaniya xweparastina ji vîrusê de pêk anî. Her wiha Heyva Sor a Kurd endam û tîmên xwe li kampê zêde kirin.

(fr)

ANHA