Cenazeyê şehîdê sivîl Elî Menla li Şêrawayî hate veşartin

Elî Menla yê 65 salî duh dema nimêja sibeha dikir di topbarana artêşa Tirk a dagirker û çeteyên wê yên li ser gundê Aqîbe yê navçeya Şêrawa ya kantona Efrînê şehîd bû.

Bi hezaran şêniyên herêma Efrînê cenazeyê şehîd Elî Menla ji ber nexweşxaneya Avrîn a kantona Şehbayê wergirtin û ber bi gundê Aqîbê yê navçeya Şêrawa ya kantona Efrînê ve bi rê ketin.

Merasîm li qada gundê Aqîbe bi deqeyeke rêzgirtin destpê kir. Bi navê Meclisa Malbatên Şehîdan Xeyrî Îbrahîm sersaxî ji malbata şehîd Elî re xwest û êrişên artêşa Tirk a dagirker şermezar kir.

Îbrahîm Menla anî ziman ku rêxistinên navdewletî ji ber bêdengiya xwe ji êrişên dagirkeriya Tirk ên li dijî sivîlan berpirsyar e.

Hevserokê Meclisa Navçeya Şêrawa Ehmed Suleyman axivî û berxwedana gelê Efrîn û Şehba ya li hemberê êrişên dagirkeriya Tirk silav kir.

Suleyman destnîşan kir ku dewleta Tirk a dagirker hewl dide îradeya gelê Kurd bişkîne û komkujiyan li dijî wê pêk bîne.

Endama Meclisa Kantona Efrînê Zelûx Bekir jî axivî, banga domandina berxwedanê li dijî dagirkeriya Tirk kir.

Piştre endama Komîteya Perwerdeya Civaka Demorkatîk Zeyneb Xubarî nasnameya şehîd xwend û radestî malbatê kir.

Cenazeyê Elî Menla li gundê Aqîbe yê navçeya Şêrawayî hate veşartin.

ANHA