Koçberên Efrînê dest bi hemleya çandina daran kir

Ji destpêka dagirkirina kantona Efrînê di 18’ê Adara 2018’an de ji hêla dewleta Tirk û çeteyên wê ve, hovanetirîn binpêkirinên li dijî şênî û xwezayê pêk tînin. Her wiha hê jî kiryarên şewat, qutkirin û talankirina bi hezaran daran û hawîrdorê wekî zeytûnan ku temenê wan 70 salan derbas dike, didome.

Desteya Çandiniyê û Şaredariya Gel a Efrînê bi hevkariya şêniyên Kampa Berxwedan a girêdayî navçeya Fafînê ya kantona Şehbayê, dest bi hemleya çandina darên cur bi cur ji darên merx û xemlê li ser komînên di kampê de kir.

Hedefa hemleyê çandina 600 daran e, jê 250 darên sîwanê li hundirê kampê, 200 darên merxê li derdorê û kolanên sereke û 150 darên xemlê ye.

Li aliyekî din jî şênî 2 hezar şitilan amade dikin ku di demeke pêş de li parka kampê biçînin, ew şitil ji cureyên cihêreng ên gulan in wekî qurnefîl, rihan, qeregûz û cureyên dîtir.

Der barê vê hemleyê de rêveberê Şaredariya Kampa Berxwedanê Welîd Ehmed diyar kir ku ev hemle dersivdana li ser binpêkirinên dewleta Tirk a dagirker ên li dijî xwezaya Efrînê ye. Welîd Ehmed wiha got: "Dewleta Tirk a dagirker di şewat, dizîn û qutkirina darên li kantona Efrînê de bi hedefa bazirganiya wê, berdewam e û wek şêniyên Efrînê bersiva me li dijî binpêkirinên dewleta Tirk a dagirker beşdariya projeya darçandin li kantona Şehbayê ye."

Ehmed got: "Li gorî me, xweza jiyana me ye, wek civaka Efrînê ji xweza û hawîrdorê hez dikin û naxwazin zirar bigihînê. Ji lew re me bi şêniyên kampê re dest bi hemleya darçandinê ya nêzî 600 dar û 2 hezar şitilên cur bi cur ji gulan di hundirê kampê de kiriye."

Rebîa Hesen ji şêniyên Efrînê ye û wiha got: "Em ê girîngiya zêdetir bidin çandina daran û parastina xwezayê û nahêlin dewleta Tirk a dagirker bi rêbazên xwe yên faşîst vîna me ya bihêz bişikîne.”

Rêxistina Mafên Mirovan a Herêma Efrînê di raporeke xwe de eşkere kiribû ku dewleta Tirk a dagirker û çeteyên girêdayî wê zêdetirî 50 hezar darên zeytûnê  û yên cur bi cur qut kirin.

(fr)

ANHA