Şêniyên Efrînê sersaxî da malbatên şehîdên Berxwedana Rûmetê

Bi sedan şêniyên herêma Efrînê berê xwe da konê sersaxiyê yê şehîdên Berxwedana Rûmetê û sersaxî ji malbatên wan re xwest.

NÛÇE

27 mijdar, 2019 13:01

ŞEHBA

Konê sersaxiyê ji aliyê Meclisa Malbatên Şehîdan ve li pêşiya navenda wan li gundê Til Qirah ê girêdayî navçeya Ehdas a kantona Şehbayê hat vedan.

Navên şehîdan wiha ne: Reşîd Mûsa (Xabûr Hawar), Bêrîvan Hisên (Şayan Sebrî) û Şîlan Hedad (Binefş Cûdî).

Merasîma sersaxiyê bi rêzgirtinê dest pê kir. Piştre bi navê Meclisa Malbatên Şehîdan a Herêma Efrînê Xelîl Îso, bi navê Rêveberiya Xweser a Herêma Efrînê Mihemed Hisên û bi navê Kongreya Star jî Emel Nebû axivîn. Axaftvanan fedakariyên şehîdan ên di oxira jiyaneke azad û birûmet de, destnîşan kirin.

Axaftvanan her wiha tekez kir ku ew ê ji dagirkeriya dewleta Tirk û çeteyên wê re serî netewînin û berxwedana xwe berdewem bikin.

Piştre wesîqetên şehîdan ji aliyê endama Meclisa Malbatên Şehîdan Avdar Mihemed ve hatin xwendin û radestî malbatên wan hatin kirin.

Merasîm bi sloganên silavkirina berxwedanê û dilsoziya bi şehîdan re bi dawî bû.

ANHA