Ji bo vegera şêniyên Efrînê 19 hezar îmze kom kirin

Hejmara îmzeyên ji bo vegera koçberên Efrînê ku partiyên siyasî yên taxa Şêxmeqsûd li mal û warên xwe kom kirine, gihîştiye nêzî 19 hezar îmzeyan.

18 mijdar, 2019 07:04

HELEB-MIHEMED EBDO – ARIF SILÊMAN

Partiya Yekitiya Demokratîk (PYD) û Partiya Pêşerojê ya Sûriyê, di 6`ê Mijdarê de li taxa Şêxmeqsûd a bajarê Helebê dest bi hemleya komkirina îmzeyan kir. Hemle bi armanca vegera şêniyên Efrînê û redkirina binpêkirinên dagirkeriya dewleta Tirk li ser şêniyan de ye.

Têkildarî hemleyê berdevkê Komîteya Komkirina Îmzeyan û endamê Rêveber ê Buroya Têkiliyan a Meclisa Sûriya Demokratîk şaxê Helebê Bedran Hemo da zanîn ku ji destpêka hemleyê ve karîbûn 18 hezar û 976 îmzeyan kom bikin û got: “Hemle hîna berdewam e heta herî zêde îmzeyan kom dikin.”

Bedran Hemo destnîşan kir, wan 15 komîteyên komkirina îmzeyan ava kirine û armanc ji bo vegera şêniyên Efrînê yên neçarî koçberiyê bûne da ku vegerin ser malên xwe û xaka ku ji aliyê çeteyên artêşa Tirk a dagirker ve hatiye dagirkirin.

Hemo tekez kir ku ew amade ne her xebateke aştiyane bikin li dijî dagirkeriyê û binpêkirin û kiryarên çeteyên artêşa Tirk a dagirker rawestînin û li hemberî guhertina demografîk rawestin.

Komîte dê îmzeyan radestî konsolxaneya Rûsyayê ya li bajarê Helebê bike.

(rr)

ANHA