Li Şehbayê merasîma xiyabî ya şehîdên Berxwedana Rûmetê

Bi sedan şêniyên herêma Efrînê îro tev li merasîma şehîdên Hêzên Sûriya Demokratîk (QSD) û Yekîneyên Parastina Jin (YPJ) Hindî Hindî (Birûsk Şêrawa), Zîlan Hisên (Gêrîla Çiya), Mihemed Elo (Kendal Tîrêj), Şefîq Bîlel (Mazlûm Dogan) û Şiyar Cemo (Welat Efrîn) bûn ku di şerên bi artêşa Tirk a dagirker û çeteyên wê de, di Berxwedana Rûmetê de şehîd bûne.

Merasîm li Kampa Berxwedan hat lidarxistin û bi deqeyeke rêzgirtinê dest pê kir. Piştre bi navê Meclisa Malbatên Şehîdan ji rêveberiya meclisê Şadiye Ibrahîm û bi navê Kongreya Star jî Hediye Yusif axivîn.

Hediye Yusif di destpêka axaftina xwe de sersaxî ji malbatên şehîdan re xwest û wiha got: "Berxwedana gelan li Sûriyê di Berxwedana Serdemê û Berxwedana Rûmetê de, li raya giştî bandor kir û hişt ku bi mafên gelan biaxivin. Ji ber vê yekê berxwedana wan rewa ye."

Hediye Yusif tekez kir ku wê berxwedana xwe heta pêkanîna serkeftinê û têkbirina dagirkeriyê berdewam bikin.

Piştre wesîqetên şehadetê ji aliyê endamên Meclisa Malbatên Şehîdan Mihemed Ebdo û Newroz Ebdo ve hatin xwendin û radestî malbatan hatin kirin.

Merasîm bi dirûşmên dilsoziya bi şehîdan re û silavkirina berxwedanê bi dawî bû.

ANHA