Şêniyên Girkê Legê di meşê de banga yekrêziyê li hember dagirkiriyê kirin

Bi sedan şêniyên navçeya Girkê Legê û gudewarên wê bi hemû pêkhateyên xwe li Qada Şehîd Xebat Dêrik a navçeyê kom bûn û li dijî êrîşên dewleta Tirk a dagirker meşek li dar xist.

Di meşê de wêneyên şehîdên Berxwedana Rûmetê, wêneyên qurbaniyên topbaraniyên çekên kîmyawî û pankartên bi nivîsên şermezarkirina êrêşên dewleta Tirk hatin hildan.

Meş ji qadê dest pê kir. Di meşê de dirûşmeyên şermezarkirina êrîşên dewleta Tirk, silavkirina berxwedana şervanên QSD`ê û banga yekîtiyê hatin berzkirin.

Meş li qada navendê veguherî mitîngê. Di mitîngê de Hevseroka Meclisa Sûriye Sûriya Demokratîk (MSD) Emîne Umer axivî û Berxwedana Rûmetê silav kir û hemû şehîd bi bîr anîn.

Emîne di axaftina xwe de wiha got:"Em di pêvajoyeke zehmet re derbas dibin. Ev pêvajo ji bo me çarenûs e. Planên navdewletî hene ku hebûna gel û nasnameya wê dikin hedef."

Emîne destnîşan kir ku dewleta Tirk dixwaze hebûna gelê kurd û gelên herêmê tune bike, demografiya herêmê biguhere û şêniyên herêmê neçarî koçberiyê bike. Her wiha jî Emîne got, dewleta Tirk dixwaze gelên herêmê bi çekên qedexekirî, qir bike.

Hevseroka MSD`ê Emîne Umer di dawiyê de bang li tevahî gelên herêmê kir ku di yek rêzê de li hember êrîşên dewleta Tirk a dagirker û komployên navdewletî, bisekinin.

Mitîng bi dirûşmên silavkirina Berxwedana Rûmetê, bi dawî bû.

(bx)

ANHA