Îmad Serêkaniyê: Em ê parastina gelê xwe bikin û pişta xwe nadin hêzên derve

Der barê vekişandina hêzên Koalîsyona Navneteweyî tevî alavên leşkerî ji nuqteyên sînor ji bajarên Serêkaniyê û Girê Spî, ji fermandarên Meclisa Leşkerî yê Serêkaniyê Îmad Serêkaniyê ji ANHA`yê re axivî.

Îmad Serêkaniyê got: "Agahiya me ji hevpeymana ku di navbera Koalîsyona Navneteweyî û dewleta Tirk de tune bû ku di encama wê de hêzên koalîsyonê ji baregehên xwe yên li ser sînor vekişîn."

‘Em pişta xwe nadin hêzên derve’

Îmad Serêkaniyê wiha axivî: "Em pişta xwe nadin hêzên derve, em pişta xwe didin hêz û gelê xwe. Hebûn û tunebûna hêzên Koalîsyona Navneteweyî li ser xaka wan, îradeya me ya ji bo parastina xak û gelê me naşikîne."

Der barê gefên dewleta Tirk ên êrîşa Bakur û Rojhilatê Sûriyê de Îmad Serêkaniyê wiha got: "Em van gefan cidî dibînin. Eger êrîşek bi ser herêmên me de çêbe, em ê parastina herêm û gelê xwe bikin.”

‘Divê cîhan baş bizane ku dê şerekî cîhanî bi serkêşiya Erdogan pêk were`

Her wiha der barê daxuyaniya Fermandariya Giştî ya QSD`ê de ku diyar kir ku eger dewleta Tirk êrîşî herêmê bike, dê şerek li ser sînorê di navbera Tirkiye û Bakurê Sûriyê dest pê bike, Îmad Serêkaniyê wiha got: "Em dibêjin ku eger guleyek gelê me bike armanc, em ê bi rêya biryara fermandariya xwe parastinê bikin û şerek li ser sînorê di navbera bakurê Sûriyê û Tirkiyê de dê dest pê bike."

Fermandar Îmad Serêkaniyê wiha domand: "Divê cîhan bizane ku eger êrîşek ser herêmê pêk were, dê şerekî cîhanî bi serkêşiya Erdogan li herêmê çêbe."

Di dawiya axaftina xwe de Îmad wiha got: "Ev şer li ser hemû cîhanê xetere ye û em ê erka xwe ya parastina gel û xaka xwe pêk bînin."

(jo)

ANHA