Li Şedadê mazot li şêniyan hate belavkirin

Komîteya Sotemenî ya navçeya Şedadê dest bi belavkirina mazotê kir. Para her malbatekê 400 lître bi buhaya 75 lîreyên Sûriyê ji her lîtrekê re.

CIVAK Û JIYAN

2 cotmeh, 2019 18:34

HESEKÊ

Li gorî serokê Komîteya Sotemenî Husam El-Miberêd bi nêzîkbûna zivistanê re komîteya sotemenî ya girêdayî navçeya Şedadê dest bi belavkirina sotemenî li ser gundên dûrî navçeyê kir ji bo ku belavkirin li ser bajêr û gundewar hêsan bikin.

El-Miberêd destnîşan kir ku para her malbatekê 400 lître ye. Prosesa belavkirinê li gundên dûrî navçeya Şedadê mîna Celal, Ebû Hamza, El-Fedxemî û El-Ewed tevî gundên girêdayî Mergede, Erîşa û El-Deşîşe bidawî kirine.

El-Miberêd diyar kir ku dê sotemenî bê pere li ser malbatên şehîdan û dibistanan belav bikin. Girêdayî mijarê tekez kir ku komîteyê belavkirina mazotê ji dibistanan re bi dawî kiriye û dê di hefteya bê de mazotê li malbatên şehîdan belav bikin.

Hejmara şêniyên navçeyê û navçeyên nêzî wê zêdetirî 25 hezar malbat e. Ji ber wê û ji bo ku beriya zivistanê sotemenî bighêje şêniyan komîteyê zû dest bi belavkirinê kirin.

(şx)

ANHA