Li Serêkaniyê wergirtina berhemên pembo destpê kir

Rûbera çandina pembo li bakurê Sûriyê ji ber aloziya li Sûriyê kêm bibû. Lê piştî rizgarkirina herêmê ji çeteyên DAIŞ`ê û girîngiya ku Rêveberiya Xweser dide çandina pembo vegeriya mîna berê.

Rêveberiya Xweser beriya 3 salan piştî ku hemû pêwîstî ji cotkaran re peyda kir, berhemê pembo ji cotkaran dikirî û pirsgirêkên kêmbûna çandina pembo çareser kir.

Rêveberiya Xweser a Bakur û Rojhilatê Sûriyê ji bo wergirtina pembo 5 navend diyar kir, her wiha buhayê her kîloyeke li gorî radeya başbûna wê diyar kir. Ferqa di navbera radeya yekemîn û dehan 10 lîreyên sûrî ye.

Navenda Sehif a herêma Serêkaniyê ji navendên îro dest bi wergirtina berhemê pembo kiriye. Berpirsan diyar kir ku ew navend dikare rojane 2 hezar ton ji bembo werbigre.

Gerînendeyê Giştî yê kargehê û derxistina pembo ji Bakur û Rojhilatê Sûriyê Ehmed Yûnis diyar kir ku navenda Sefih dikare 25 hezar ton ji pembo werbigre (Rojane 2 hezar ton).

Yûnis bang li cotkaran kir ku destpêkê serî li komîteyên çandiniyê yên li herêmê bidin da ku belgeyên pêwîst bigre û navê xwe di navendê de qeyd bikin.

Yûnis destnîşan kir ku piştî wergirtina pembo bi 15  heta 20 rojan cotkar dikarin fatoriyên xwe bigrin.

(bx)

ANHA