Li Dêrikê bîranîna şehîdan

Meclisa Malbatên Şehîdan a herêma Dêrik û navçeyên wê merasîmê bîranîna 234 cagoriyên mehên Nîsan, Gulan, Hezîran û Tîrmehê ku li cih û dîrokên cûda de şehîd bûne li Goristana Şehîd Xebat Dêrik li dar xist.

Bîranîna ku bi hezaran kes ji şêniyên Dêrikê, Girkê Gelê, Çilaxa û Til Koçerê tevlê bibûn bi merasîmeke leşkerî ji aliyê YPG, YPJ û Hêzên Asayîşê ve dest pê kir.

Piştre ji fermandarên YPG‘ê Mihyedîn Xêrkê axivî, cangoriyên azadiyê bi bîr anîn û got: "Gelê Bakur û Rojhilatê Sûriyê li hemberî DAIŞ‘ê û hevkarên wê yên ku xwestin tecrûbeya Rêveberiya Xweseriya Demokratîk têk bibe çek hilgirt û bi hevgirtina xwe ya niştimanî DAIŞ‘ê têk bir."

Bi navê Meclisa Malbatên Şehîdan a Girkê Legê Mihemed Ebas jî axivî û got: "Xwîna pêkhateyên Bakur û Rojhilatê Sûriyê di eniyên parastina nirxên mirovahiyê tevlihev bû."

Ebas her wiha qurbaniyên komkujiya 3‘yê Tebaxa 2014‘an a li ser Şengalê bi bîr anîn û got: "Pêşmergeyên PDK‘ê gelê Êzidî wekî pariyek xwarin ji çeteyên DAIŞ‘ê re hiştin. Çeteyan komkujiyên herî hovane li ser Êzidiyan pêk anîn, jin revandin, îxtiyar, zarok û pitik qetil kirin. YPG û YPJ‘ê banga gelê Êzidî pêk anî û ew ji pencên çeteyan rizgar kirin."

Piştre navên şehîdên hatin bibîranîn, hatin xwendin.

Di dawiya merasîmê de şêniyên gul li ser gorên şehîdan danîn.

ANHA