Şêniyên Hesekê cenazeyê şehîd Sîpan spartin axê

Şêniyan cenazeyê şervanên QSD`ê şehîd Silêman El-Zahir bi nasnav Sîpan Hesekê ku li  gundewarê Dêrazorê dema li ser erka xwe bû şehîd bûbû ji ber navenda Meclisa Malbatên Şehîdan wergirtin û bi kerwanekî wesayîtan ber bi Goristana Şehîd Dijwar a li gundê Dawûdiyê ve ketin rê..

Li goristanê merasîm bi deqeyek rêzgirtin li gel torenek leşkerî ji hêla QSD`ê ve destpê kir. Paşê endama Meclisa Malbatên Şehîdan a Hesekê Sefîre Xalid axivî û sersaxî ji malbata şehîd re xwest. Sefîre rola şehîdan ji bo rizgarkirina herêmê ji çeteyan û parastina şêniyan ji şaneyên veşartî destnîşan kir.

Ji aliyê xwe ve endamê rêveber ê Buroya Têkiliyên Giştî ya QSD`ê Serhildan Rojava got: "Di şexsê şehîd Silêman de em tevahiya şehîdên azadiyê bi bîr tînin. Şehîd bi giyanê biratiya gelan şerê terorê kir û bû lehengên neteweya demokratîk."

Endamê Partiya Yekitiya Demokratîk (PYD) Mistefa Ehmed destnîşan kir ku herêm bi saya fedekariyên pêkhateyên herêmê ji Kurd, Ereb û Suryan herêm ji tariya DAIŞ`ê rizgar bû û dê ev serkeftin di rûpelên dîrokê de wek destanên lehengiyê were nivisandin.

Piştî wê endama Meclisa Malbatên Şehîdan Rojda Ehmed wesîqeya şehadeta şehîd xwend û radestî malbata wî kir.

Di dawiya merasîmê de girseya gel cenazeyê şehîd di nav tilîliyên dayikan de spartin axê.

(şx)

ANHA