Parlamenterê Swîsreyê ji bo destwerdana rewşa Efrînê bang kir

Endamê Meclisa Niştîmanî ya Swîsreyê parlamenter Bernard Gul ji Meclisa Yekitiya Swîsreyê re li ser binpêkirinên dagirkeriya Tirkiyê û çeteyên wê yên li Efrînê axivî.

Gul wiha got: “Dewleta Tirk û çeteyên wê, binpêkirinên der heqê gelê Sûriyê û di serî de li gelê Kurd ê li Efrînê dike.” Gul rapor û daxuyaniyên Rêxistina Lêborînê ya Navneteweyî wek şahid diyar kirin.  

Gul bal kişand ser rewşa li Efrînê û wiha pê de çû: "Sivîlên li Efrînê rastî revandinê tên, her wiha koçberkirina bi darê zorê, talankirina mal û milkên wan tê kirin û bacan li wan ferz dikin."

Bernard Gul bang li Meclisa Swîsreyê kir ku bersiva van pirsan bide:

- Şêniyên Efrînê yên ku ji herêmên xwe ji ber êrîşên Tirkiyê koçber bûn, li ku derê dijîn û di nav çi rewşê de ne?

- Swîsre dê tu alîkariyên mirovî ji wan koçberan re pêşkêş bike, dê çawa pêşkêş bike?

- Swîsre der heqê binpêkirinên li ser gelê Kurd li Efrînê û hemû Sûriyê de dê çi pêşkêş bike?

- Meclisa Swîsreyê der barê pêşkêşkirina alîkariyan ji koçberên li Efrînê re û jib o ku ji nû ve wan li xaka wan vegerînin û mîsogeriya ewlehiya wan bike, dê çi bike?

- Eger hikumeta Swîsreyê guh nade doza vegera koçberên Efrînê li welatê wan, rola wan di vegerandina mal û milkên şêniyên Efrînê de ku Tirkiye talan dike, dê çi be, dê çi tedbîran bigire?

- Meclisa Swîsreyê çi dike ji bo ku nehêle Tirkiye herêmên din li Sûriyê dagir bike, yan jî nehêle êrîşeke din ji aliyê Tirkiyê û komên çekdar ve li ser Minbic û herêmên din pêk were?

- Komîseriya Navneteweyî bi sponseriya Neteweyên Yekbûyî piştgiriya aştiya li Sûriyê dike yan na?

(jo)