Li Dêrazorê meşa 8’ê Adarê

Bi dirûşma "Bi berxwedana jinan jiyan geş dibe û teror têk diçe" bi sedan jinên Dêrazorê beşdarî xwepêşandana 8’ê Adarê bûn.

JIN

7 adar, 2019 12:48

DÊRAZOR

Meşa 8’ê Adarê Roja Jinan a Cîhanê ji Çerxerêya El-Kesrat a Dêrazorê dest pê kir û bi sedan jinên herêma Dêrazorê tev lê bûn. Di meşê de pankartên bi nivîsên "8’ê Adarê domana berxwedana Efrînê ye”, “Jinên birêxistinkirî bedewbûna jiyanê ne” û “Ji Roza û Clara heta Zenûbiyaya Serdemê û Leyla Guven berxwedan didome" hildan.

Meşvan li nava kolanên navçeyê ber bi têketina gundê Hemar El-Elî ve meşiyan û li wir meş veguherî mîtîngê.

Di mîtingê de endama rêveber a Meclisa Jinên El-Kesrat Heyam Mihemed axivî û Roja Jinan a Cîhanê li tevayî jinên cîhanê pîroz kir û wiha got: "Bi keda şervanên YPG û YPJ’ê cara yekem e ku piştî ji terorê rizgar bûn, roja xwe li dar dixin û pîroz dikin.”

Heyam bal kişand ser fedakarî û têkoşîna jinên Bakur û Rojhilatê Sûriyê û rola wan a di hemû hêlên jiyanê de. Paşê endama Meclisa Zagonsaz Melak Rebah wiha axivî: "Têkoşîna jinan cîhan tev hejand û jinan îsbat kir ku dikarin bi berxwedanê parastina xak û rûmeta xwe bikin."

Meş bi dirûşmeyên silavkirina berxwedana jinan bi dawî bû.

(fr)

ANHA