Şehîdên Şerê Tunekirina Terorê li Şedadê hatin oxirkirin

Bi merasîmeke biheybet şêniyên navçeya Şedadê û gundên wê cenazeyên 5 şehîdên Şerê Tunekirina Terorê li Goristana Şehîdan a Şedadê oxir kirin.

NÛÇE

6 sibat, 2019 12:41

HESEKÊ

Şêniyan cenazeyên şehîdên QSD`ê Yasir El-Hemûd (Aras Hesekê), Basim Ehmed (Hogir), Ziyab El-Selamê (Dêrî), Ebdulhemadî (Hisên El-Dêrî), Elî El-Elawî (Elî Şedadê) û Isam El-Selamê (Mihemed Şedadê) ji pêşiya Meclisa Malbatên Şehîdan a bajarê Hesekê wergirtin û bi karwanekî tirêmbêlan ber bi Goristana Şehîdan a Şedadê ve ketin rê.

Li goristanê merasîmeke biheybet bi toraneke leşkerî ji aliyê Hêzên Erka Xweparastinê û YPG`ê ve hate lidarxistin. Paşê, bi navê YPG`ê fermandar Demhat Hesekê axivî û sersaxî ji malbatên şehîdan re xwest.

Demhat Hesekê teqez kir ku bi saya lehengiya şehîdan, herêm ji çeteyan hatin rizgarkirin û nêzîk e ku DAIŞ tune bibe.

Paşê bi navê Saziya Malbatên Şehîdan endama bi navê Seher Ebdellah axivî û sersaxî ji malbatên şehîdan re xwest û wiha got: "Em çi qas bikin, em mafê şehîdan nikarin bidin, wan canê xwe ji bo azadî û rûmetê kir xelat."

Paşê wesîqetên şehîdan hatin xwendin û radestî malbatên wan hatin kirin.

Di dawiya merasîmê de, cenazayên şehîdan bi dirûşme û tilîliyên dayikan hatin definkirin.

ANHA