Rewşa li Efrînê bi wêneyan parve dikin

HELEB

Rewşenbîrên Helebê bi armanca piştigiriya Berxwedana Serdemê ya Efrînê û şermezarkirina binpêkirinên dagirkeriya Tirkiyê û çeteyên bi dirûşmeya "Ji bo te ey Efrîn" pêşangeheke wêneyî vekir.

Pêşangeh saet di 11:00‘an de li Hola Zeytûn a beşê rojhilatê taxa Şêxmeqsûdê hate vekirin.

26 tablo ku bi destê şêwekar Ardelan Îbarhîm, Henîf Hemo, Rewşen Sîno, Lodmîla Horor û Şervîn Mihemed ve hatin çêkirin di hatin pêşandan.

Wêneyên pêşangehê balê dikşîne ser bajarê Efrînê beriya ku were dagirkirin û piştî wî sembolên jinên berxwedêr mîna Barîn Kobanê û Avesta Xabûr. Her wiha sûcên dagirkeriya Tirkiyê û çeteyên wê li dijî sivîlan û berxwedana gelê Efrînê li Şehbayê.

Şêwekar Erdelan Îbarhîm ji ajansa me re axivî û got: "Armanca me ya vekirina vê pêşangehê teşhîrkirina sûcên dewleta Tirk a dagirker û çeteyên wê li Efrînê. Wekî rewşenbîrên Efrînê em ê bi tabloyên xwe bûreyên li Efrînê rû didin parve bikin."

Îbrahîm her wiha destnîşan kir ku waneyên hatine pêşandan Berxwedana Serdemê ya 58 rojên destpêkê, azarên koçberiya şêniyan û berxwedana li Şehbayê belge dike û anî ziman ku çalakiyên wan ên bi vê mebestê berdewam in.

Pêşangeh dê 3 rojan dewam bike, di roja dawî de dê fîlmek bi navê "Bajarê aştiyê" were pêşandan.

ANHA