PYD`ê bang li gelên cîhanê kir ku li dijî siyasetên Tirkiyê dakevin qadan

NAVENDA NÛÇEYAN

Partiya Yekitiya Demokratîk (PYD) bi boneya salvegera destpêkirina êrîşên dagirkirina Efrînê daxuyaniyeke nivîskî weşand.

Di daxuyaniyê de PYD`ê got herêma Efrînê ku bûbû cihê herî ewle li Sûriyê, rastî êrîşa hovane ya dewleta Tirk hat, her wiha bal kişand ser berxwedana gel û hêzên parastinê li dijî êrîşên artêşa dagirker û çeteyên wê. PYD`ê da zanîn ku di encama êrîşê de bi sedan sivîlan jiyana xwe ji dest da û bi sed hezaran jî ji cihên xwe hatin derxistin û niha li kantona Şehbayê dijîn.

Berdewama daxuyaniyê wiha ye:

“Li aliyekî dewleta Tirk hewl dide gelê Kurd ji rehên wî hilke, tişta ku DAIŞ`ê li Şengalê kir mîna kuştin û revandina jinan û serjêkirinê, niha artêşa Tirk û çeteyên wê li dijî gelên Efrînê dikin. Her wiha kesên ku ji welatên cuda û herêmên din ên Sûriyê anîne, li wir bi cih dike û guhertina demografîk pêk tîne.

Li hember van siyasetên qirkirinê yên dewleta Tirkiyê û gefên li dijî ezmûna demokratîk a li Bakur û Rojhilatê Sûriyê pêwîst e cîhan bi lez helwestê nîşan bide. Bi taybet li dijî kiryarên artêşa Tirk û çeteyên wê li Efrînê, divê hêzên cîhanî ji bo vegera welatiyên Efrînê tê bikoşin û piştgiriya têkoşîna gelê me ya rizgarkirina Efrînê bikin. Her wiha divê cîhan hemû zanibe ku Tirkiye nûneriya terorê li Sûriyê dike.

Li aliyekî din jî gelê Efrînê li dijî dagirkeriyê û alavên wê li ber xwe dide, lê hê jî hêzên cîhanî û navdewletî li hember vê trajediyê bê deng in ku ev trajedî birînek e di dilê hemû Kurdên çar parçeyên Kurdistanê de û di dilê hemû welatperwerên Sûriyê de.

Em wek Partiya Yekitiya Demokratîk dibînin ku tişta li Efrînê çêbû di encama lihevhatineke qirêjî ya navdewletî de pêk hat û li ser bazara xwîna welatiyên Kurd ên bêguneh ku bûbûn bendeke asê li dijî terora cîhanî. Niha dem hatiye ku hêzên demokrat ên ku mafên gelan û nirxên demokrasiyê diparêzin, bibin yek û baweriy xwe biparêzin û roja 20`ê Çileyê wek ‘roja cîhanî ya piştgiriya Efrînê’ ragihînin û piştgiriya berxwedêrên Efrînê bikin da ku Efrîn di demeke nêz de vegere ji xwediyên xwe re.

Di dawiyê de em bang li hemû gelê xwe yê li hundir û derve, hemû hêzên ku baweriyê bi demokrasî û mafên gelan tînin, dikin; roja 20`ê Çileyê li dijî siyasetên qirkirinê yên artêşa Tirk û guhertinên demografîk derkevin qadan û hemû hewldanên xwe bixin xizmeta rizgarkirina Efrînê.”

(k)

ANHA