Parlamenter Sirri Sakik: Ger dewlet dixwaze pirsgirêkê çareser bike divê gavên qanûnî biavêje

Parlamenterê DEM Partiyê yê Agiriyê Sirri Sakik der barê daxuyaniya KCK’ê û hevdîtinên dîplomatîk ên dawîn ên Tirkiye, Sûriyeyê, Iraq û Îranê de pirsên ajansa me bersivandin. 

Sirri Sakik da zanîn ku daxuyaniya KCK’ê ji bo domdariya pêvajoyê peyamek e û wiha got: “Gelê Kurd gelek caran bihîstiye ku “em ê çareser bikin.” Niha dema gotinan derbas bûye, niha demê gavên pratîk e.”

Sakik diyar kir ku dîplomasî mafê dewletan e lê heke ev hevkarî tenê li ser “ewlehiya” Kurdan were avakirin, ew ne aştiyê tîne û ne jî aramiyê.

‘DIVÊ KURD PÊWENDIYÊN XWE YÊN NAVXWEYÎ XURTTIR BIKIN’

Sirri Sakik bal kişand ser derfetên ku niha di pirsgirêka Kurd de derketiye holê û wiha domand: “Kurd ne li Tirkiyeyê, ne li Sûriyeyê, ne li Iraqê û ne jî li Îranê aramiya domdar nayê avakirin. Ji ber vê yekê, divê Kurd yekem pêwendiyên xwe yên navxweyî bi hêztir bikin, zimanê yekitî û diyalogê bi pêş bixin.

Di daxuyaniya dawîn a KCK’ê de kîjan xal ji we re herî girîng bûn? Li gorî we armanca sereke ya vê daxuyaniyê çi ye û ev daxuyanî ji bo pêvajoya çareseriyê çi peyam dide?

Ji min re ya herî girîng ew e ku di daxuyaniyê de bal kişandin ser wê yekê ku pêvajoya aştiyê tenê bi gotinan nayê meşandin. Ger dewlet bi rastî dixwaze vê pirsgirêkê çareser bike, divê gavên qanûnî û demokratîk biavêje. Ji bo pêvajoyekê ku pê ewlehiya civakê û baweriya gelan ava bibe, daxuyaniyên siyasî bi tenê têr nake.

Ez vê daxuyaniyê wekî bangekê ji bo domandina pêvajoyê dibînim. Peyama sereke ew e ku heke îradeyek ji bo çareseriya demokratîk hebe, divê ev îrade bi kiryaran were piştrastkirin. Gelê Kurd gelek caran bihîstiye ku “em ê çareser bikin.” Niha dema gotinan derbas bûye; niha dema gavên pratîk e.

Em dixwazin ev pêvajo ne tenê raweste, lê bi bingehekî demokratîk û mafperest berdewam bike.

Di van demên dawîn de tevger û gavên dîplomatîk ên di navbera Tirkiye, Îran, Sûriye û Iraqê de zêde bûne. Li gorî we ev hevkarî yan jî dan û standin dê çawa bandorê li rewşa siyasî ya Kurdan bike?

Rastiya herêmê ev e ku tu guhertinek bêyî hesabkirina pirsgirêka Kurd ne pêkan e. Kurd ne meseleya 4 welatan in; Kurd miletek in ku li çar parçeyan dijîn û di her welatekî de daxwazên xwe yên demokratîk hene.

Dîplomasiya dewletan mafê wan e. Lê heke ev hevkarî tenê li ser “ewlehiya” Kurdan were avakirin, ew ne aştiyê tîne û ne jî aramiyê. Dîrok nîşan da ku siyasetên înkar, zordarî û operasyonan pirsgirêk ne çareser kirine, berevajî wê, ew kûrtir kirine.

Ger ev dan û standin li ser bingeha maf, demokrasiya û hevjiyanî were avakirin, ew dikare derfet be. Lê ger armanc tenê koordînasyona tedbîrên ewlehiyê be, wê ne ji bo Kurdan û ne jî ji bo heremê encameke erênî çêke.

Encamên van pêwendiyên nû yên 4 welatan li ser siberoja pirsgirêka Kurd çi ne? Hûn xetere û derfetên sereke li ku dibînin? Kurd divê çi bikin?

Di her krîza herêmî de hem xetere hene hem jî derfet. Xetere ew e ku dîsa pirsgirêka Kurd tenê wekî pirsgirêkeke ewlehiyê were dîtin. Ev nêzîkatî di sedsaleke borî de tu encameke baş neda.

Derfet jî ew e ku niha hemû kes dizanin bê çareserkirina pirsgirêka Kurd ne li Tirkiyeyê, ne li Sûriyeyê, ne li Iraqê û ne jî li Îranê aramiya domdar nayê avakirin. Ev rastiyek e ku nikare were veşartin.

Ji ber vê yekê, divê Kurd yekem pêwendiyên xwe yên navxweyî bi hêztir bikin, zimanê yekitî û diyalogê bi pêş bixin û li ser mafên demokratîk, ne li ser cudahiyan, li hev bikin. Her wiha divê civaka navneteweyî jî bizane ku pirsgirêka Kurd ne pirsgirêkeke ewlehiyê ye; ew meseleya maf, demokrasî û welatîbûna wekhev e.