Jinên Efrînê dest bi greva birçîbûnê kir

ŞEHBA

Kongreya Star a Efrînê li gundê Babinis ê kantona Şehbayê bi armanca şermezarkirina tecrîdkirina Rêberê Gelê Kurd Abdullah Ocalan û piştgiriya çalakiya Leyla Guven, bi dirûşmeya "Em ê girtîgeha Îmraliyê hilweşînin û bi rêber Ocalan re azad bijîn" çalakiya greva birçîbûnê da destpêkirin. 60 jin tev li çalakiyê bûne. Çalakî dê 3 rojan berdewam bike.

Cihê çalakiyê bi wêneyên şehîdên Berxwedana Serdemê, Rêberê Gelê Kurd Abdullah Ocalan, hevseroka KCD`ê û parlamentera HDP`ê ya Culemêrgê ya bakurê Kurdistanê Leyla Guven, pankartên bi nivîsên “Azadiya Ocalan azadiya hemû gelan e" û "Ji bo azadiya rêber Ocalan serî hildin" hate xemilandin.

Endamên Yekitiya Jinên Êzidî, Tevgera Jinên Ciwan û bi dehan şêniyên herêmê tev li çalakiyê bûn.

Di çalakiyê de endama Koordînasyona Kongreya Star a kantona Efrînê Newroz Haşim axivî û destnîşan kir ku jinên Efrînê di qonaxa duyemîn a Berxwedana Serdemê de piştgiriyê didin çalakiya Leyla Guven û berxwedana wê di girtîgeha Amedê de û silav li sekna wê ya li dijî dewleta Tirk a dagirker dikin.

Newroz diyar kir ku dewleta Tirk a dagirker tu carî nikare îradeya gelê Kurd û têkoşîna wan ji bo azadiya Rêberê Gelê Kurd Abdullah Ocalan bişikîne. Di dawiyê de Newroz diyar kir ku ew ê têkoşîna xwe heta bidawîkirina tecrîdkirina Rêberê Gelê Kurd Abdullah Ocalan berdewam bikin.

Paşê ji aliyê endamên Meclisa Malbatên Şehîdan Hacer Miho û Sûreya Hebeş, bi navê Kongreya Star a navçeya Ehdasê Hesna Hesen ve axaftin hatin kirin. Di axaftinan de hate diyarkirin ku Rêberê Gelê Kurd Abdullah Ocalan ji bo azadiya gelan tê dikoşe û rola jinan di nava civaka de sereke ye û wiha hate gotin: "Divê hemû jin rola xwe ya sereke di nava civakê de bilîzin û têkoşîna xwe ji bo azadiya Rêberê Gelê Kurd Abdullah Ocalan û rakirina tecrdîkirina wî xurt bikin."

Her wiha di axaftinan de bêdengiya navdewletî û rêxistinên mafên mirovan der barê siyaseta dewleta Tirk a dagirkr li dijî Rêberê Gelê Kurd Abdullah Ocalan û gelê Bakurê Sûriyê de hate şermezarkirin.

Tê payîn ku çalakiya greva birçîbûnê dê 3 rojan dewam bike.

(bx)

ANHA