Komcivîna çandî ya jinên ciwan li ser asta Sûriyê tê lidarxistin

HESEKÊ

Komcivîn li xwaringeha El-Nuxbe ya taxa El-Eziziyê ya bajarê Hesekê bi beşdarbûna 200 jinên ciwan ji herêmên cuda yên Sûriyê, hevseroka Meclisa Sûriya Demokratîk Emîne Umer, seroka Desteya Rêveber a MSD`ê Îlham Ehmed û hevseroka Meclisa Giştî ya Rêveberiya Xweser a Bakur û Rojhilatê Sûriyê Sîham Qeryo tê lidarxistin.

Li salona komcivînê, wêneyên jinên têkoşer ku ji bo mafên jinan têkoşîn kirine, pankartên “Me bi ciwanî dest pê kir, em ê bi ciwanî bi ser bikevin”, “Ger jin rizgar nebe, civak jî rizgar nabe” hatin daliqandin.

Di komcivînê de ku dê heta saetên êvarê dewam bike, dê der barê mijara ‘jinan û çandê’ de nîqaş werin kirin.

Ji rêveberên Meclisa Sûriya Demokratîk Rena Ehmed axivî û behsa girîngiya komcivînê û rola jinan di parastina çanda xwe de kir. Emîne Umer da zanîn ku jin li Bakur û Rojhilatê Sûriyê di şoreşê de gelekî bi pêş ketin û ji adet û kevneşopiyên paşverû xilas bûn. Sîham Qeryo jî axivî û da zanîn ku jinên Bakurê Sûriyê ji hemû cîhanê re îsbat kir ku ew nimûneya jinên azad in.

Ji rêveberên Meclisa Malbatên Şehîdan a Herêma Cizîrê Sumeye Mihemed jî lidarxistina komcivînê pîroz kir û hêvî kir ku jinên ciwan zêdetir xwe bi pêş bixin û serkeftinên nû bi dest ve bînin.

Komcivîn dewam dike.

(kc)

ANHA