Gelê Kobanê cangoriyên azadiyê yên  meha Mijdarê bi bîr anîn

KOBANÊ

Merasîmê bîranîna şehîdan meha mijdarê ji aliyê Meclisa Malbatên Şehîdan a Kantona Kobanê ve hate organîzekirin.

Bi sedan şêniyên kantonê beşdarî bîranînê bûn.

Merasîm bi deqeyeke rêzgirtin dest pê kir. Piştre li ser navê Asayîşa Kobanê Salih Kobanî û li ser navê Meclisa Malbatên şehîdan Şînda Kenco axaftin hatin kirin.

Axaftvanan behsa nirxên şehadetê kirin û diyar kirin ku bi saya wan pêkhateyên Bakurê Sûriyê azad jiyan dikin û ev tişt anîn ziman: "Em bejnê xwe li hemberî hemû şehîdên azadiyê ditewînin. Gelê me yê Kobanê dizane dîroka me dîrokeke berxwedaniyê ye, rojên me hemû rojên berxwedanê ne. Di 29`ê Mijdara 2014`an  de çeteyên DAIŞ`ê bi hevkariya dewleta Tirk êrîşî dergehê Murşidpînarê yê Kobanê kirin. Li hemberî van êrîşên hovane şervanên azadiyê bi awayekî efsaneyî li ber xwedan û bersiva êrîşan dan".

Axaftvanan her wiha behsa berxwedana Serdemê ya Efrînê kirin û diyar kirin ku ji bo Efrînê ji destên çeteyan rizgar bikin dê asta xebat û têkoşîna xwe bilindtir bikin û wiha dawî li axaftina xwe anîn: "Gelê ku xwîna şehîdan pîroz dibîne, ti carî bi bin nakeve û serkeftin dê para berxwedana Efrînê be. "

Di dawiya merasîmê de welatiyan mom vêxistin û durişmeyên dilsoziya bi şehîdan re qîriyan.

(hk/şm)

ANHA